Ֆրենկ Փալոնն անդրադարձել է ՆԱՏՕ-ի գլխավոր քարտուղարի այցին Հայաստան
2 րոպեի ընթերցում
![Ֆրենկ Փալոնն անդրադարձել է ՆԱՏՕ-ի գլխավոր քարտուղարի այցին Հայաստան](http://armenpress.am/resized/480/static/news/b/2024/03/1132799.jpg)
ԵՐԵՎԱՆ, 20 ՄԱՐՏԻ, ԱՐՄԵՆՊՐԵՍ: Ամերիկայի Միացյալ Նահանգների Կոնգրեսի անդամ Ֆրենկ Փալոնը կարծում է, որ անհրաժեշտ է շարունակել աշխատանքը՝ Հայաստանի և Արևմուտքի միջև համագործակցության ընդլայնման և Կովկասում կայունություն ապահովելու ուղղությամբ։
«Արմենպրես»-ի հաղորդմամբ՝ ԱՄՆ Կոնգրեսի հայկական հարցերով հանձնախմբի համանախագահ Ֆրենկ Փալոնն այս մասին գրառում է կատարել X-ի իր միկրոբլոգում։
Pleased to see @jensstoltenberg in Yerevan reaffirming @NATO's partnership with Armenia & its recognition of Armenia's territorial integrity. We must keep working to strengthen this relationship, increase cooperation between Armenia & the West, & bring stability to the Caucasus. https://t.co/uM23RED5TF
— Rep. Frank Pallone (@FrankPallone) March 19, 2024
«Հաճելի է տեսնել, որ Յենս Ստոլտենբերգը (խմբ․ ՆԱՏՕ-ի գլխավոր քարտուղար) Երևանում վերահաստատում է ՆԱՏՕ-ի ու Հայաստանի միջև գործընկերությունը և ճանաչում է Հայաստանի տարածքային ամբողջականությունը։ Մենք պետք է շարունակենք աշխատել այդ հարաբերություններն ամրապնդելու, Հայաստանի և Արևմուտքի միջև համագործակցությունն ընդլայնելու և Կովկասում կայունություն ապահովելու համար»,- գրել է կոնգրեսականը։
ՆԱՏՕ-ի գլխավոր քարտուղար Յենս Ստոլտենբերգը Հարավային Կովկաս կատարած այցի շրջանակներում մարտի 17-ին գտնվել է Բաքվում և հանդիպել Ադրբեջանի նախագահի, ԱԳ նախարարի և Պաշտպանության նախարարի հետ։ Հաջորդ օրը գլխավոր քարտուղարն այցելել է Թբիլիսի՝ հանդիպում ունենալով Վրաստանի վարչապետի և նախագահի հետ։ Տարածաշրջանային այցը եզրափակվել է մարտի 19-ին Հայաստան կատարած այցելությամբ, որի ընթացքում Ստոլտենբերգը հանդիպել է ինչպես վարչապետ Նիկոլ Փաշինյանին, այնպես էլ նախագահ Վահագն Խաչատուրյանին։