Նոր կարգավորումներով գյուղատնտեսական արտադրանքի դիմաց վճարումները պետք է կատարվեն առավելագույնը 30 օրացուցային օրում
2 րոպեի ընթերցում
![Նոր կարգավորումներով գյուղատնտեսական արտադրանքի դիմաց վճարումները պետք է կատարվեն առավելագույնը 30 օրացուցային օրում](http://armenpress.am/resized/480/static/news/b/2024/03/1132767.jpg)
ԵՐԵՎԱՆ, 19 ՄԱՐՏԻ, ԱՐՄԵՆՊՐԵՍ։ Մրցակցության պաշտպանության հանձնաժողովի նախաձեռնությամբ քննարկում է տեղի ունեցել գյուղմթերքի արտադրությամբ և վերամշակմամբ զբաղվող ընկերությունների և այլ շահագրգիռ անձանց հետ՝ ներկայացնելու համար նոր օրենսդրական փոփոխությունները, որոնցով կարգավորվում են գյուղատնտեսական արտադրանքի դիմաց ուշ վճարումների հարցերը:
Ինչպես «Արմենպրես»-ին տեղեկացրին Մրցակցության պաշտպանության հանձնաժողովից, նոր կարգավորումներով էական փոփոխություններ են կատարվել գյուղատնտեսական արտադրանքի իրացման և ձեռքբերման հարաբերություններում: Մասնավորապես, սահմանվել է լիովին նոր ինստիտուտ՝ գյուղատնտեսության արտադրանքի իրացման բանակցային ուժեղ դիրք, և հանձնաժողովի որոշմամբ սահմանվել են դրա չափորոշիչները: Այսպես՝
- եթե գյուղատնտեսական արտադրանք իրացնողը ֆիզիկական անձ է, ապա ձեռք բերողը կարող է ունենալ բանակցային ուժեղ դիրք նախորդ տարվա հասույթը 25 մլն դրամը գերազանցելու դեպքում:
- Այն դեպքում, երբ իրացնողը իրավաբանական անձ է կամ անհատ ձեռնարկատեր, սահմանվել են իրացնողի և ձեռք բերողի հասույթների հարաբերակցության շեմեր՝ սկսած 25 մլն դրամից: Միաժամանակ, ձեռք բերող կազմակերպության հասույթը պետք է 10 անգամ գերազանցի իրացնողի հասույթի չափը:
- Տնտեսավարողի վարքագիծը կարող է հանգեցնել բանակցային ուժեղ դիրքի չարաշահման, եթե վերջինս չի կատարում գյուղատնտեսական արտադրանքի դիմաց վճարումները 30 օրացուցային օրվա ընթացքում: Ընդ որում, նշված դեպքերով Հանձնաժողովը կարող է տուգանք կիրառել՝ տվյալ իրավախախտմանը նախորդող տարվա հասույթի մինչև 10 տոկոսի չափով:
Ըստ աղբյուրի՝ օրենսդրական կարգավորումները ուժի մեջ կմտնեն մայիսի 6-ից:
Նշվում է, որ միջոցառման ընթացքում հանձնաժողովի աշխատակիցները ներկայացրել են իրականացված օրենսդրական փոփոխությունների մանրամասները և պատասխանել մասնակիցների բարձրացրած մի շարք հարցերի: