2 րոպեի ընթերցում
ՊԵԿԻՆ, 3 ՄԱՐՏԻ, ԱՐՄԵՆՊՐԵՍ։ Շուրջ 3000 չինացի օրենսդիր Պեկինում պատրաստվում են երկրի օրենսդիր կառույցի և իշխանության բարձրադիր մարմնի՝ Ժողովրդական ներկայացուցիչների համաչինական ժողովի (NPC) առաջիկա նստաշրջանին, որը կմեկնարկի մարտի 5-ին։ Նստաշրջանից մեկ օր առաջ՝ մարտի 4-ին բարձրագույն քաղաքական խորհրդատվական մարմինը՝ Չինաստանի ժողովրդական քաղաքական խորհրդատվական խորհուրդը (CPPCC), կանցկացնի իր տարեկան նիստը՝ Ժողովրդական ներկայացուցիչների համաչինական ժողովին քաղաքական և սոցիալական հարցերի վերաբերյալ խորհուրդներ և առաջարկություններ ներկայացնելու համար:
Չինաստանի ժողովրդական քաղաքական խորհրդատվական խորհրդի Ազգային հանձնաժողովի երկրորդ նիստի խոսնակ Լիու Ջիեյը մարտի 3-ին մամուլի ներկայացուցիչներին տեղեկություններ հաղորդեց նստաշրջանի վերաբերյալ։
Մասնավորապես, նա հայտնեց, որ խորհրդատվական մարմնի անդամները շարունակելու են կենտրոնանալ երկրի արդիականացման խթանման վրա՝ զարգացման նպատակներին հասնելու համար: «Երկու նստաշրջան» անվանումը ստացած NPC-ի և CPPCC-ի նիստերի ընթացքում հայտարարություններ են արվելու տնտեսական զարգացման նպատակների վերաբերյալ։ Այդ նպատակները կհրապարակվեն կառավարության զեկույցում, որը սովորաբար ներառում է ՀՆԱ-ի աճի թիրախները, գնաճի, զբաղվածության, արտաքին առևտրի, ներդրումների և այլ ոլորտներ։
Ակնկալվում է նաև, որ ուշադրության կենտրոնում կլինի Չինաստանի նոր քաղաքական նախաձեռնությունը, որը ստացել է «Նոր արդյունավետ ուժեր» անվանումը։ Այն վերաբերում է արտադրական ուժերին, որոնք ի հայտ են եկել գիտատեխնոլոգիական առաջընթացի և նորարարությունների արդյունքում։
Սույն հոդվածը պատրաստվել է Չինաստանի Մամուլի հաղորդակցության միջազգային կենտրոնի (CIPCC) 2024 թվականի լրագրողական փոխանակման ծրագրի շրջանակում։