Գրիգոր Լուսավորիչ եկեղեցում մատուցվել է Հայրապետական Պատարագ Սուրբ Ծննդյան և Աստվածհայտնության տոնի առիթով
1 րոպեի ընթերցում
![Գրիգոր Լուսավորիչ եկեղեցում մատուցվել է Հայրապետական Պատարագ Սուրբ Ծննդյան և Աստվածհայտնության տոնի առիթով](http://armenpress.am/resized/480/static/news/b/2024/01/1127486.jpg)
ԵՐԵՎԱՆ, 6 ՀՈՒՆՎԱՐԻ, ԱՐՄԵՆՊՐԵՍ։ Հունվարի 6-ին Հիսուս Քրիստոսի Սուրբ Ծննդյան և Աստվածհայտնության տոնի առիթով Ն.Ս.Օ.Տ.Տ. Գարեգին Երկրորդ Ծայրագույն Պատրիարք և Ամենայն Հայոց Կաթողիկոսը Սուրբ Պատարագ է մատուցել Երևանի Սուրբ Գրիգոր Լուսավորիչ մայր եկեղեցում: «Արմենպրես»-ի փոխանցմամբ՝ այս մասին հայտնել է Մայր Աթոռի տեղեկատվական համակարգը։
Հայրապետական խաչվառազարդ թափորը «Խորհուրդ խորին» շարականի հանդիսավոր երգեցողության ներքո Ամենայն Հայոց Կաթողիկոսին Սուրբ Տրդատի մատուռից առաջնորդել է դեպի Սուրբ Խորան։
Սուրբ Պատարագին որպես առընթերականեր սպասավորել են Մայր Աթոռի լուսարարապետ Գերաշնորհ Տ. Մուշեղ եպիսկոպոս Բաբայանն ու ԵՊՀ Աստվածաբանության ֆակուլտետի դեկան և Երևանի Սուրբ Գրիգոր Լուսավորիչ մայր եկեղեցու հոգևոր տեսուչ Գերաշնորհ Տ. Անուշավան եպիսկոպոս Ժամկոչյանը։
Սուրբ Պատարագի ընթացքում Ամենայն Հայոց Կաթողիկոսը «Քրիստոս ծնաւ եւ յայտնեցաւ» հրեշտակաբարբառ ավետիսով ողջունել է աշխարհասփյուռ հայությանը և տոնի առիթով հղել իր պատգամը: