2 րոպեի ընթերցում
ԳՅՈՒՄՐԻ, 23 ԴԵԿՏԵՄԲԵՐԻ, ԱՐՄԵՆՊՐԵՍ: Գյումրու քաղաքապետ Վարդգես Սամսոնյանը՝ գյումրեցի փոքրիկների օգնությամբ, վառեց Վարդանանց հրապարակում տեղադրված՝ Գյումրու գլխավոր տոնածառի լույսերը։ Ինչպես տեղեկացնում է «Արմենպրես»-ը, լույսերի վառմանը զուգահեռ տեղի ունեցավ նաև Գյումրու կենտրոնական հրապարակում կազմակերպվող ամանորյա տոնավաճառի բացումը:
Լրագրողների հետ զրույցում քաղաքապետը շնորհավորեց բոլորին գալիք տոների կապակցությամբ։ «Հուսով ենք, 2024-ին ավելի շատ աշխատանքներ կկարողանանք իրականացնել: Խաղաղություն, առողջություն, միասնականություն լինի, թև թիկունքի տանք, բոլորս միասին մեր երկիրը, մեր քաղաքը շենացնենք»,-նշեց Վարդգես Սամսոնյանը` տեղեկացնելով, որ թեև այս տարի քիչ գումար է հատկացվել տոնածառի համար, բայց այն տարածաշրջանում միակ բնական տոնածառն է այս բարձրության, իսկ հաջորդ տարվա համար քաղաքապետը խոստացավ փոխել այն։
Քաղաքի գլխավոր տոնածառն արդեն երկար ժամանակ չի փոխվել այն պատճառաբանությամբ, որ ճոխությունների փոխարեն քաղաքային բյուջեի սուղ միջոցները ավելի կարևոր խնդիրների կուղղվի։ Այս տարի Գյումրու ավագանին գլխավոր տոնածառի, դեկորների տեղադրման ու լուսավորման աշխատանքների համար հատկացրել է 6 մլն դրամ։ Սոճու ճյուղերը բերվել են Լոռուց։ Գյումրու գլխավոր տոնածաը ունի 27 մ բարձրություն։