«Երևանյան բեսթսելեր»․ «Շունն ու կատուն» ՝ առաջատար. մանկական. հոկտեմբեր, 2023

ԵՐԵՎԱՆ, 24 ՆՈՅԵՄԲԵՐԻ, ԱՐՄԵՆՊՐԵՍ: «Արմենպրես»լրատվական գործակալության «Երևանյան բեսթսելեր» հեղինակային նախագիծն այս շաբաթ ներկայացնում է մանկական և պատանեկան գեղարվեստական ստեղծագործությունների լավագույն տասնյակը՝ ըստ հոկտեմբերի վաճառքի տվյալների:

Առաջին տեղում է «Շունն ու կատուն» գիրքը։ Այս հեքիաթի սյուժեի մասին կարելի է ընդհանրապես չխոսել, քանի որ այն ծանոթ է յուրաքանչյուր փոքրիկի: Թումանյանական այս հեքիաթը սիրված է շատերի կողմից:

Երկրորդ հորիզոնականում«Երեքխոզուկները»մանկական հեքիաթն է: Գիրքը հնարավորություն է տալիս փոքրիկներին ծանոթանալու երեք խոզուկների արկածներին:

Էդգար Մեջինյանի «Գլոբրի» հեքիաթը երրորդ տեղում է։ Այն օրինակելի և կախարդական պատմություն է դպրոցական կյանքի մասին՝ անսպասելի ավարտով, որի էությունը ինքնավստահությունն է։ «Գլոբրի» — հեքիաթը հեղինակի առաջին գիրքն է։ Գիրքը նվիրվում է ժամանակակից ուսուցչի լավագույն կերպարին՝ Մարիանա Նաիկյանին։

Չորրորդ հորիզոնականում«Երեքխոզուկները»մանկական հեքիաթն է (մեկ այլ հրատարակչության): Գիրքը հնարավորություն է տալիս փոքրիկներին ծանոթանալու երեք խոզուկների արկածներին:

Հինգերորդ տեղում է «Բոքոնիկը» գիրքը: Բոքոնիկի մասին հեքիաթը հանդիպում է ռուսական և ուկրաինական բանահյուսություններում, ինչպես նաև ունի իր նմանակները շատ ժողովուրդների մոտ: Սյուժեն հանդիպում է նաև սկանդինավյան, գերմանական, ուզբեկական, թաթարական և այլ հեքիաթներում:

Խնկո Ապոր առակներն ամփոփող «Առակներ» ժողովածուն վեցերորդն է։ Առակների հերոսները կենդանական և բուսական աշխարհի ներկայացուցիչներ են, իրեր, լուսատուներ և այլն։ Անտիկ շրջանում և միջնադարում առակները արձակ ժանրի ստեղծագործություններ էին, սակայն հետագայում դրանք սկսեցին գրվել չափածո։

Շառլ Պերրոյի «Կոշկավոր կատուն» յոթերորդ տեղում է։ Գլխավոր հերոսների 3D փազլների օգնությամբ երեխան պատմում է հեքիաթը և բեմականացնում տիկնիկային ներկայացում:

Հովհաննես Թումանյանի «Սուտասանը և Ճամփորդները» ութերորդ տեղում է։ Գրքին ամրացված ձայնային մոդուլի օգնությամբ հնչում են Հովհաննես Թումանյանի «Սուտասանը և Ճամփորդները» ստեղծագործությունները:

Իններորդ տեղում է Գրիգոր Քեշիշյանի «Երկնքում շատ աստղեր կան» պատմվածքների ժողովածուն։ Վերջինիս մեջ ներառվել են գաղափարներ ընտանեկան ջերմության, սիրո, փոխըմբռնման և նվիրվածության, ծնող-երեխա բազմաշերտ փոխհարաբերությունների, ընտանիքում տիրող խաղաղ և ջերմ մթնոլորտի կարևորության մասին։

Տասներորդ տեղում է «20 հեքիաթ արքայադուստրերի մասին» գիրքը։ «20 հեքիաթ արքայադուստրերի մասին» ժողովածուն իր մեջ ներառում է պատմություններ ամենասիրված հեքիաթային արքայադուստրերի մասին: Վառ նկարազարդումներով, գեղեցիկ ձևավորումներով այս գիրքն ասես բերված լինի հեքիաթային աշխարհից, որտեղ բնակվում են սիրված մուլտֆիլմերի ու հեքիաթների բոլոր-բոլոր հերոսները:

Տեղ	Փոփ.	Գիրք		Հրատ.	Քանակ
1	+1		«Շունն ու կատուն»	Բուկինիստ	72
2	+1		«Երեք խոզուկները»	Բուկինիստ	68
3	նոր		Էդգար Մեջինյան, «Գլոբրի»	հեղ․հրատ	52
4	*		«Երեք խոզուկները»	GSM	51
5	0		«Բոքոնիկը»	Բուկինիստ	51
6	*		«Առակներ»	GSM	51
7	*		Շառլ Պերրո, «Կոշկավոր կատուն»	Բուկինիստ	46
8	*		Հովհաննես Թումանյան, «Սուտասանը և Ճամփորդները»	GSM	45
9	+1		Գրիգոր Քեշիշյան, «Երկնքում շատ աստղեր կան»	Դավինչի	35
10	-3		«20 հեքիաթ արքայադուստրերի մասին»	Դավինչի	25

«Երևանյան բեսթսելերը» ներկայացրեց Ռոզա Գրիգորյանը

Ցանկում ներառված չեն «Երևանյան բեսթսելեր» մրցանակի արժանացած գրքերը

Վարկանիշային ցուցակի կազմման հարցումներին մասնակցել են «Բուկինիստ» (011-53-74-13), «Հայ գիրք-Դարան» (56-80-38), «Զանգակ» (011-22-33-66), «Նոր գրախանութ» ( 044-53-74-74) գրախանութների և գրատների ցանցերը: