1 րոպեի ընթերցում
ԵՐԵՎԱՆ, 17 ՆՈՅԵՄԲԵՐԻ, ԱՐՄԵՆՊՐԵՍ: Հայաստանի ֆուտբոլի ազգային ընտրանու գլխավոր մարզիչ Ալեքսանդր Պետրակովը Եվրոպայի առաջնության ընտրական փուլի առաջիկա խաղում ազգային թիմին ֆավորիտ չի համարում:
«Ուելսի դեմ խաղում մենք ֆավորիտ չենք: Այս խաղը բացարձակ այլ կլինի, քան առաջին հանդիպումն էր: Մեզ «բաց» հանդիպում չի սպասվում: Երկու թիմի նպատակը վաղվա խաղում դրական արդյունքն է»,-«Արմենպրես»-ի հաղորդմամբ` լրագրողների հետ հանդիպման ժամանակ ասաց մասնագետը:
Պետրակովն ընդգծեց, որ ֆուտբոլիստների հետ զրույց է ունեցել և ակնկալում է ինքնանվիրված խաղ ու դրական արդյունք:
«Հույս ունեմ, որ մեր մարզադաշտում` մեր երկրպագուների առաջ խաղում, մենք դրական արդյունքի կհասնենք: Այս խաղով ֆուտբոլիստները հնարավորություն ունեն մտնելու պատմության մեջ»,-առանձնացրեց նա:
Ֆուտբոլի Եվրոպայի առաջնության ընտրական փուլի նախավերջին տուրում` Հայաստանի հավաքականը նոյեմբերի 18-ին կհյուրընկալի Ուելսի ընտրանուն: Հանդիպումը կմեկնարկի Երևանի ժամանակով 18:00-ին: