Ալեքսանդր Պետրակովը Կոսովոյի դեմ ընկերական հանդիպումը լավ ստուգողական խաղ է համարում
1 րոպեի ընթերցում
![Ալեքսանդր Պետրակովը Կոսովոյի դեմ ընկերական հանդիպումը լավ ստուգողական խաղ է համարում](http://armenpress.am/resized/480/static/news/b/2024/03/1133062.jpg)
ԵՐԵՎԱՆ, 22 ՄԱՐՏԻ, ԱՐՄԵՆՊՐԵՍ: Հայաստանի ֆուտբոլի ազգային ընտրանու մարզիչ Ալեքսանդր Պետրակովը գոհ է Կոսովոյի հետ ընկերական խաղում ֆուտբոլիստների կատարած աշխատանքից:
«Մենք ֆիզիկապես չզիջեցինք մրցակցին: Լավ ստուգողական հանդիպում ստացվեց: Խաղում էինք եվրոպական լավ մակարդակ ունեցող թիմի հետ: Դրվագների վերջնամասում մեզ չէր բավարարում վերջին հարվածը, ինչը, գուցե, գալիս է վարպետության պակասից»,-«Արմենպրես»-ի հաղորդմամբ` լրագրողների հետ հանդիպման ժամանակ ասաց Պետրակովը:
Գլխավոր մարզիչը ընդգծեց, որ խաղից հետո հանդերձարանում շնորհակալություն հայտնեց ֆուտբոլիստներին խաղի համար:
«Վարազդատ Հարոյանը իսկական ավագ է: Նա կատարում է իր առջև դրված խնդիրը և երիտասարդներն էլ օրինակ են վերցնում նրանից: Նա հրաշալի հանդիպում անցկացրեց Կոսովոյի դեմ»,-ասաց նա:
Հայաստանի հավաքականը Երևանում ընկերական հանդիպում անցկացրեց Կոսովոյի թիմի դեմ՝ զիջելով նվազագույն հաշվով։
Հայաստանի ֆուտբոլի ազգային թիմը մարտի 26-ին արտագնա մրցախաղ կունենա Չեխիայի հետ: