ԼՂ-ում բենզինի պահեստի պայթյունի տարածքում նոր մասունքներ են հայտնաբերվել
1 րոպեի ընթերցում
![ԼՂ-ում բենզինի պահեստի պայթյունի տարածքում նոր մասունքներ են հայտնաբերվել](http://armenpress.am/resized/480/static/news/b/2023/09/1120743.jpg)
ԵՐԵՎԱՆ, 26 ՍԵՊՏԵՄԲԵՐԻ, ԱՐՄԵՆՊՐԵՍ։ Ստեփանակերտ-Ասկերան ավտոճանապարհին հարակից գտնվող բենզինի պահեստի պայթյունի տարածքում իրականացված որոնողական աշխատանքների արդյունքում հայտնաբերվել են նոր մասունքներ։
«Արմենպրես»-ի հաղորդմամբ՝ այս մասին տեղեկացնում են ԼՂ ՆԳՆ արտակարգ իրավիճակների պետական ծառայությունից՝ հավելելով, որ նրանց ինքնությունը բացահայտելու նպատակով կիրականացվի դատաբժշկական փորձաքննություն։
Նույն տարածքից հայտնաբերվել են անձնական իրեր։
Ծառայությունը նաև հրապարակել է դրանց լուսանկարները՝ նշելով, որ հարազատները կարող են մոտենալ ԱԻՊԾ օպերատիվ շտաբ, որը գտնվում է կառավարության շենքում։
Սեպտեմբերի 25-ին Ստեփանակերտ-Ասկերան ավտոճանապարհի հարակից տարածքում` բենզինի պահեստում, ուժեղ պայթյուն է տեղի ունեցել։
ՀՀ առողջապահության նախարարության տվյալներով՝ Լեռնային Ղարաբաղի բժշկական կենտրոններից արդեն իսկ Հայաստան են տեղափոխվել Ադրբեջանի սանձազերծած ագրեսիայի և Ստեփանակերտի հարակից տարածքում պայթյունի հետևանքով տուժած բոլոր պացիենտները:
Գերատեսչությունը հայտնել է, որ սեպտեմբերի 27-ի դրությամբ, Լեռնային Ղարաբաղից ցամաքային և օդային ճանապարհով հանրապետության բժշկական կազմակերպություններ է տեղափոխվել 349 վիրավոր: