Շահագրգիռ կողմերը քայլեր են ձեռնարկում՝ Ստեփանակերտում իրավիճակը հանգուցալուծելու նպատակով․ ԼՐԱՑՎԱԾ
2 րոպեի ընթերցում
![Շահագրգիռ կողմերը քայլեր են ձեռնարկում՝ Ստեփանակերտում իրավիճակը հանգուցալուծելու նպատակով․ ԼՐԱՑՎԱԾ](http://armenpress.am/resized/480/static/news/b/2023/09/1120169.jpg)
ԵՐԵՎԱՆ, 21 ՍԵՊՏԵՄԲԵՐԻ, ԱՐՄԵՆՊՐԵՍ։ Շահագրգիռ կողմերի ներգրավմամբ կոնկրետ քայլեր են ձեռնարկվում՝ իրավիճակը Ստեփանակերտում հանգուցալուծելու նպատակով: Լեռնային Ղարաբաղի Ներքին գործերի նախարարության ոստիկանությունը հորդորում է ստեփանակերտցիներին անվտանգության նկատառումներից ելնելով մնալ ապաստարաններում։
«Ադրբեջանական կողմը խախտել է կրակը դադարեցնելու մասին սեպտեմբերի 20-ին ձեռք բերված պայմանավորվածությունը և Ստեփանակերտի մատույցներում կիրառել հրաձգային զինատեսակներ: Շահագրգիռ կողմերի ներգրավմամբ կոնկրետ քայլեր են ձեռնարկվում՝ իրավիճակը հանգուցալուծելու նպատակով: Հորդորում ենք չտրվել խուճապային տրամադրություններ տարածող գրառումներին և հետևել միայն պաշտոնական լրահոսին»,-«Արմենպրես»-ի հաղորդմամբ՝ նշվում է գերատեսչության տարածած հաղորդագրության մեջ։
Սեպտեմբերի 19-ին Լեռնային Ղարաբաղում Ադրբեջանի սանձազերծած ռազմական գործողություններից հետո սեպտեմբերի 20-ին հրադադարի պայմանավորվածություն էր ձեռք բերվել։ Արցախում սեպտեմբերի 20-ի ժամը 21:30-ի դրությամբ կա առնվազն 200 զոհ և ավելի քան 400 վիրավոր: Քաղաքացիական բնակչության շրջանում վիրավորների թիվը գերազանցում է 40-ը, որից 13-ը երեխաներ են: Հաստատվել է 10 քաղաքացիական զոհ, որից 5-ը՝ երեխա։