Հրատապ օգնություն Լեռնային Ղարաբաղին․ Փարիզի քաղաքապետն անդրադարձել է ԼՂ-ում ստեղծված հումանիտար ճգնաժամին
2 րոպեի ընթերցում
![Հրատապ օգնություն Լեռնային Ղարաբաղին․ Փարիզի քաղաքապետն անդրադարձել է ԼՂ-ում ստեղծված հումանիտար ճգնաժամին](http://armenpress.am/resized/480/static/news/b/2023/08/1118362.jpg)
ԵՐԵՎԱՆ, 30 ՕԳՈՍՏՈՍԻ, ԱՐՄԵՆՊՐԵՍ։ Փարիզի քաղաքապետ Ան Իդալգոն անդրադարձել է Ադրբեջանի կողմից Լաչինի միջանցքի արգելափակման հետևանքով Լեռնային Ղարաբաղում ստեղծված հումանիտար ճգնաժամին՝ նշելով, որ այդ իրավիճակում հրատապ օգնություն են ցուցաբերում Լեռնային Ղարաբաղին։
«Հայաստանում ենք Փարիզի և այլ համայնքների կողմից ընտրված պաշտոնատար անձանց հետ։ Արցախի 120 հազար բնակչությունը՝ ներառյալ 30 հազար երեխաներ, 9 ամիս մեկուսացված են, սովի են մատնված ու զրկված են ամեն ինչից։ Այս հումանիտար աղետի հետ կապված՝ մենք նրանց հրատապ օգնություն ենք ցուցաբերում»,- «Արմենպրես»-ի փոխանցմամբ՝ X-ի իր միկրոբլոգում գրել է Իդալգոն։
En Arménie, avec des élus parisiens et d'autres collectivités. Depuis neuf mois, 120 000 arméniens d'Artsakh, dont 30 000 enfants, sont isolés, affamés, privés de tout. Face à cette catastrophe humanitaire, nous leur apportons une aide d'urgence. Le temps est compté. pic.twitter.com/wJZHSH7db4
— Anne Hidalgo (@Anne_Hidalgo) August 30, 2023
Փարիզի քաղաքապետն ուղեկցում է Ֆրանսիայի մայրաքաղաքի և երկրի մի շարք խոշոր ռեգիոնների հատկացրած հումանիտար օգնությամբ բեռնված 10 բեռնատարների շարասյունը, որն օգոստոսի 30-ին Երևանից ուղևորվել է դեպի Լաչինի միջանցքի սկզբնամաս։