Արցախում հումանիտար իրավիճակը ժամ առ ժամ վատանում է․ Արցախի ՄԻՊ

ՍՏԵՓԱՆԱԿԵՐՏ, 20 ՀՈՒԼԻՍԻ, ԱՐՄԵՆՊՐԵՍ։ Ադրբեջանի կողմից Լաչինի միջանցքն ամբողջությամբ արգելափակելու հետևանքով Արցախում հումանիտար իրավիճակը ժամ առ ժամ վատանում է։ Արցախի Հանրապետության մարդու իրավունքների պաշտպանի գրասենյակը Ստեփանակերտի ամենամեծ սուպերմարկետից տեսանյութ է հրապարակել, որում երևում է, որ սուպերմարկետն ամբողջությամբ դատարկ է։

Արցախի մարդու իրավունքների պաշտպան Գեղամ Ստեփանյանը «Ֆեյսբուք»-ի իր էջում գրել է, որ սննդի և առաջին անհրաժեշտության ապրանքների բացակայությունը տառապանքներ է պատճառում 120 հազար մարդու, այդ թվում՝ 30 հազար երեխայի։ «Մարդու իրավունքների պաշտպանի գրասենյակը տեղից հաղորդում է՝ փաստաթղթավորելով աղետալի հումանիտար հետևանքները և խնդրելով միջազգային անհապաղ միջամտության»,- գրել է Ստեփանյանը։

Ադրբեջանը 2022 թվականի դեկտեմբերից փակ է պահում Արցախը Հայաստանի հետ կապող միակ ճանապարհը՝ Լաչինի միջանցքը․ նախ դա արվում էր կեղծ բնապահպանների ակցիայով, իսկ այնուհետև Ադրբեջանը անցակետ տեղադրեց միջանցքում, որը այս տարվա հունիսի 15-ից ամբողջությամբ փակվել է։