Ադրբեջանական մարտական դիրքից կրակել են գյուղատնտեսական աշխատանքներ կատարող քաղաքացու ուղղությամբ. տուժածներ չկան

ՍՏԵՓԱՆԱԿԵՐՏ, 26 ՀՈՒՆԻՍԻ, ԱՐՄԵՆՊՐԵՍ: Ադրբեջանական մարտական դիրքերից հունիսի 25-ին ժամը 16:00-ի սահմաններում հրաձգային տարբեր զինատեսակներով կրակել են Արցախի Մարտունու շրջանի Մյուրիշեն գյուղի 22-ամյա բնակիչ Միքայել Մեժլումյանի ուղղությամբ, որը Մյուրիշենից Ավդուռ տանող ավտոճանապարհի ձախակողմյան հատվածի դաշտում տրակտորով գյուղատնտեսական աշխատանքներ է իրականացրել:

Ինչպես «Արմենպրես»-ին տեղեկացրին Արցախի ՆԳՆ ոստիկանությունից, կրակոցների հետևանքով դադարեցվել են գյուղատնտեսական աշխատանքները, ոչ ոք չի տուժել: Հաղորդումը փոխանցվել է ռուսական խաղաղապահ զորակազմին: