Podcast. «Կինոաշխարհ»-ը՝ հայ և համաշխարհային կինոյի մասին պատկերացում կազմելու լավագույն հարթակ
4 րոպեի ընթերցում
ԵՐԵՎԱՆ, 16 ՀՈՒՆԻՍԻ, ԱՐՄԵՆՊՐԵՍ: Տարիներ շարունակ «Կինոաշխարհ» կայքը հասարակության տարբեր շերտերին հետաքրքիր հոդվածների միջոցով պատմում է հայ և համաշխարհային կինոյի նվաճումների մասին: Այն ոլորտի մասնագետների համար կինոյին առնչվող հիմնախնդիրները բարձրաձայնելու և քննարկելու հավաքատեղի է դառնում՝ նպաստելով հայ կինոյի զարգացմանը:
«Արմենպրես Podcast»-ի շրջանակում հյուրընկալել ենք «Կինոաշխարհ» կայքի համահիմնադիր Ռուզան Բագրատունյանին, որի հետ զրուցել ենք կայքի ստեղծման, նպատակի, ժամանակակից հայ կինոյի և այլ հարցերի մասին:
«Կինոաշխարհ»-ը սկզբում ամսաթերթ է եղել, իսկ 2013 թվականին ստեղծվել է կայքը:
Գերնպատակներից մեկը սփյուռքի ստեղծագործողներին և ընթերցողներին դեպի կայքը գրավելն է եղել: «Ցանկանում էինք Հայաստանում ստեղծվող կինոյի մասին տեղեկատվությունն ուղղել դեպի սփյուռք և հակառակը»,-նշում է Բագրատունյանը:
Միշտ հնարավորինս լայն անդրադարձ են կատարում հայկական կինոյին, նորություններին, հաջողություններին, խնդիրներին:
Նրա խոսքով՝ հատկապես վերջին տարիներին հայկական կարճամետրաժ ֆիլմերը մեծ հաջողություն են ունենում արտերկրում: «Մենք անցել ենք պատերազմի միջով, ունեցել ենք հաղթանակ, պարտություն: Ըստ իս՝ այդ կարևոր շրջանն ամբողջությամբ չի ուսումնասիրվել մեր կինոյի միջոցով, այնինչ կինոն ամենակարևոր արվեստի տեսակներից է՝ արագ տարածվող, տեղեկատվություն սփռող»,-ասում է Բագրատունյանը:
«Հայկական կինոն շատ լավ վիճակում չի եղել հետխորհրդային շրջանում, որովհետև փակվեցին կինոթատրոնները: Այսօր լիարժեք գործող մի քանի կինոթատրոն ունենք, բայց հայկական ֆիլմեր դիտելու քիչ են գնում: Կինոկենտրոնը հատուկ դիտումներ է կազմակերպում տոնական օրերին, սակայն մարդիկ քիչ են հաճախում ցուցադրություններին: Չգիտեմ, թե ինչն է պատճառը: Գուցե, պետք է շատ գովազդել, գուցե անկումային շրջան է: Չեմ կարող ասել, թե ինչն է պատճառը»,-շեշտում է նա ու ընդգծում, որ «Կինոաշխարհ»-ը լիարժեք տեղեկություններ է հաղորդում կինոյի մասին, սակայն ոչ թե լուրերի, այլ ընդարձակ հարցազրույցների, վերլուծությունների տեսքով՝ փորձելով նպաստել հայկական կինոյի նկատմամբ հետաքրքրության մեծացմանը:
Վերջին շրջանում ստեղծված ֆիլմերից Բագրատունյանին տպավորել է ռեժիսոր և սցենարիստ Իննա Սահակյանի «Ավրորայի լուսաբացը» վավերագրական-անիմացիոն ֆիլմը: «Արտասահմանյան մամուլն անընդմեջ անդրադարձել է Հայոց ցեղասպանությանը այդ ֆիլմի շնորհիվ, ինչը կարևոր փաստ է: Կուզեմ, որ հաջորդ տարիներին ևս լինեն նման լավ ֆիլմեր»,-ընդգծում է Բագրատունյանը, որը նաև Համո Բեկնազարյանի գրքի համահեղինակն է և շատ նյութեր ունի արխիվում:
Հայ կինոյի 100-ամյակի առթիվ այդ նյութերի հիման վրա «Կինոաշխարհ»-ի համար փոքր ֆիլմ է պատրաստում՝ նվիրված Բեկնազարյանին: Նրա խոսքով՝ արխիվն ուսումնասիրելիս հասկանում է, որ գործ ունի մի հսկայի հետ, որի բոլոր հնարավորությունները բացահայտված չեն եղել:
Անժելա Համբարձումյան
Լուսանկարները՝ Գևորգ Պերկուպերկյանի