Ստեփանակերտ-Ասկերան ավտոճանապարհին ավտոմեքենա է այրվել
1 րոպեի ընթերցում
![Ստեփանակերտ-Ասկերան ավտոճանապարհին ավտոմեքենա է այրվել](http://armenpress.am/resized/480/static/news/b/2023/05/1111373.jpg)
ԵՐԵՎԱՆ, 20 ՄԱՅԻՍԻ, ԱՐՄԵՆՊՐԵՍ: Ստեփանակերտ-Ասկերան ավտոճանապարհին ավտոմեքենա է այրվել, տուժածներ չկան:
«Արմենպրես»-ի հաղորդմամբ՝ այս մասին տեղեկացնում է Արցախի ՆԳՆ փրկարար ծառայությունը:
Մայիսի 19-ին ժամը 22:41-ին Ստեփանակերտ քաղաքի բնակչից «911» ճգնաժամային կառավարման կենտրոն ահազանգ է ստացվել, որ Ստեփանակերտ-Ասկերան ավտոճանապարհի 3-րդ կիլոմետրին ավտոմեքենա է այրվում, անհրաժեշտ է փրկարարների օգնությունը։
Հրդեհը մարելու և վտանգը կանխելու նպատակով, անմիջապես դեպքի վայր է մեկնել հրշեջ-փրկարարական մեկ մարտական հաշվարկ, ծառայության տնօրեն` գնդապետ Մեխակ Արզումանյանի գլխավորությամբ, ինչպես նաև ՆԳՆ ոստիկանության Ասկերանի շրջանային բաժնի ծառայողները։
Հրշեջ-փրկարարների արհեստավարժ գործողությունների շնորհիվ` ժամը 22:56-ին հրդեհը մարվել է, լիկվիդացվել` ժամը 23։15-ին:
Նախնական տվյալներով այրվել է մայրաքաղաքի բնակչին պատկանող «Ford Transit» մակնիշի ավտոմեքենայի սրահը և շարժիչի խցիկը։
Դեպքի առթիվ ստուգումներ է իրականացնում ծառայության պետական հրդեհային և տեխնիկական անվտանգության տեսչությունը: