Անպայման ուզում էի կանգ առնել այստեղ. Ֆրանսիայի ԱԳ նախարարը մոմ վառեց Ջերմուկի Սուրբ Գայանե եկեղեցում
1 րոպեի ընթերցում
ԵՐԵՎԱՆ, 28 ԱՊՐԻԼՒ, ԱՐՄԵՆՊՐԵՍ: Տարածաշրջանային այցով Հայաստանում գտնվող Ֆրանսիայի արտաքին գործերի նախարար Կատրին Կոլոնան Ջերմուկ այցելության ընթացքում Սուրբ Գայանե եկեղեցի մտավ և մոմ վառեց այնտեղ:
«Արմենպրես»-ի հաղորդմամբ՝ նախարարը նախ կանգ առավ եկեղեցու բակում Հայոց ցեղասպանության զոհերի հիշատակի խաչքարի մոտ:
«Ջերմուկ գնալիս ճանապարհին նկատեցի եկեղեցին: Եվ վերադառնալիս անպայման ուզում էի մի պահ կանգ առնել, որովհետև մեր պատկերացման մեջ Հայաստանը ներկայացված է նաև այս շատ գեղեցիկ եկեղեցիներով»,-ասաց Ֆրանսիայի արտգործնախարարը՝ եկեղեցու քահանայի հետ զրուցելիս:
Ապա նախարարը հետաքրքրվեց, թե ինչո՞ւ են Հայաստանում եկեղեցիները հիմնականում քաղաքից դուրս կառուցում: Քահանան պատասխանեց՝ երբեմն այդպես են կառուցվում, որ մարդիկ քայլելով որոշակի ճանապարհ անցնեն եկեղեցի հասնելու համար:
Քահանան տեղեկացրեց նաև, որ Սուրբ Գայանե եկեղեցին կառուցվել է 2007 թվականին: