«Նոր գիրք»-14/23. Գասպարյան, Գավալդա, Դիլ

ԵՐԵՎԱՆ, 10 ԱՊՐԻԼԻ, ԱՐՄԵՆՊՐԵՍ: «Արմենպրես»լրատվական գործակալությունը ներկայացնում է իր հեղինակային «Նոր գիրք» նախագիծը: Այն ամեն երկուշաբթի ընթերցողի դատին է հանձնում հայաստանյան հրատարակչությունների լույս ընծայած գրքերը: Գործակալության էջերում ընթերցասերները հնարավորություն ունեն տեղեկատվություն ստանալ նոր գրքերի մասին, ծանոթանալ դասական գործերին և արդի գրականության զարգացման միտումներին: Այս շաբաթ«Արմենպրես»-ն առանձնացրել է 2023 թվականին հրատարակված և հանրության դատին հանձնված տարբեր հրատարակչությունների երեք ուշագրավ գրքեր՝ տարբեր խորագրերի ներքո:

Հայ գրականություն

Նորեկ Գասպարյան, «Շուշեցի մի ծիծաղող տղեկ»

Նորեկ Գասպարյանի «Շուշեցի մի ծիծաղող տղեկ» վեպը մանկական զվարթախոսության տարերքով ստեղծված գործ է, որտեղ սեփական ընտանիքի պատմությունն ու մանկության հուշերի գունեղ նկարագրությունը աստիճանաբար վերաճում է յուրօրինակ էպիկական ասքի՝ Շուշի քաղաքի, տոհմիկ ու եկվոր շուշեցիների ոչ միանշանակ հարաբերությունների, կենցաղի ու սովորությունների մասին: Գիրքը լույս է ընծայել «Անտարես»-ը:

Թարգմանական գրականություն

Աննա Գավալդա, «Պարզապես միասին»

Վեպի գործողությունները տեղի են ունենում Փարիզում։ Հերոսները միայնակ, կյանքում իրենց տեղը չգտած երիտասարդներ են։ Ճակատագիրը նրանց միավորում է նույն հարկի տակ։ Այս գիրքը բախումների, դժվարությունների, ինչպես նաև քնքշության, ընկերության, ջերմության մասին է, այն մասին, թե որքան կարևոր են երջանկության և հաջողության ուղին գտնելու համար հոգեկից մարդիկ։ Թարգմանությունն ֆրանսերենից` Թագուհի Բլբուլյանի: Գիրքը լույս է ընծայել «Զանգակ»-ը:

Փաստավավերագրական գրականություն

Գրեգորի Դիլ, «Ամեն ոք ձեռներեց է: Տնտեսական ազատության իրացումը հետխորհրդային երկրում»

Գրեգորի Դիլի գիրքը Հայաստանի տնտեսության, ձեռնարկատիրական մտածելակերպի և հետկոմունիստական մշակույթի մասին է: Այն հայերին ցույց է տալիս, թե ինչպես արտադրել այն, ինչը նրանք արժեքավոր են համարում և վերահսկել արտադրման այդ գործընթացը: Գիտելիքը հարստության հիմնական աղբյուրն է աշխարհում:

Այն գիտելիքը, որ առաջարկում է այս գիրքը, ամփոփում է իմ լավագույն փորձը՝ մեղմելու ոչ բավարար ֆինանսական կարողության խնդիրը, որով պետք է ապահովվեին մարդկանց հարմարավետությունն ու բարգավաճումը, խնդիր, որն այլ կերպ կոչվում է աղքատություն: Հենց այսպես եմ ես ցանկանում իմ ներդրումն ունենալ մեր շուրջը առկա լայն հնարավորությունների դաշտում, որոնք կարող ենք դիտարկել որպես ավելի մեծ հարստություն: Հետևաբար՝ այս գիրքը նվիրված է յուրաքանչյուր մարդու: Թարգմանությունը՝ Տաթև Սահակյանի։ Գիրքը լույս է ընծայել «Էդիթ Պրինտ»-ը:

«Նոր գիրք»-ը ներկայացրեց Ռոզա Գրիգորյանը