2 րոպեի ընթերցում
ՊԵԿԻՆ, 28 ՍԵՊՏԵՄԲԵՐԻ, ԱՐՄԵՆՊՐԵՍ: Պեկինի ամառային Օլիմպիական խաղերից անցել է 14, իսկ ձմեռային խաղերից՝ հաշված ամիսներ, սակայն բոլոր սպորտային կառույցները ոչ միայն շարունակում են գործել, այլ նաև շարունակաբար ծառայում են իրենց նպատակին:
«Արմենպրես»-ի հաղորդմամբ՝Պեկինի Օլիմպիական այգին տեղակայված է Չաոյան թաղամասում և բացառիկ է նրանով, որ եղել է 2008 և 2022 թվականների օլիմպիական մարզաձևերի հիմնական կենտրոնը: Այգում տեղակայված են Խաղերի 9 հիմնական կառույցները, այդ թվում՝ 50 մետր երկարությամբ օլիմպիական լողավազանը, որը 2022 թվականի ձմեռային խաղերի համար վերածվել էր կյոռլինիգի մարզահամալիրի:
Խաղերի ավարտից ամիսներ անց Պեկինի ջրային մարզաձևերի կենտրոնը կրկին ծառայում է լողորդներին և վերածվել է լողի ակումբի, բացի այդ՝ կառույցի մյուս հատվածում առկա է նաև երեխաների համար նախատեսված ջրաշխարհ: Իսկ ջրային կենտրոնի այցեքարտերից մեկը ներքին հարկերում տեղակայված սառցադաշտն է, որտեղ իրենց մարզումներն են անցկացնում տարբեր մարզաձևերի ներկայացուցիչներ:
Մարզահամալիրի առանձին մի անկյունում իր ձեռքի հետքն է թողել ոլոր ժամանակների մեծագույն մարզիկներից մեկը` լողորդ Մայքլ Ֆելփսը: Այստեղ մեծ հպարտությամբ են հիշում, որ հենց Պեկինում է, որ Ֆելփսը նվաճել է իր ամենաշատ ոսկե մեդալները` 8 ոսկե մեդալ:
Օլիմպիական ենթակառույցները Խաղերի ավարտից հետո էլ ծառայում են մարզասերներին իրենց ամբողջ ներուժով:
Չմշկավազքի ազգային կենտրոնը, որը տեղավորում է 12 հազար հանդիսական, բացառիկ ճարտարապետական լուծումներով սպորտային կառույց է: Հենց այստեղ` չմշկավազքի ազգային կենտրոնում էր, որ 2022 թվականի ձմեռային Օլիմպիական խաղերում նոր ռեկորդներ գրանցվեցին և թարմացվեցին նախորդները:
Սահադաշտը բաց է պեկինցիների համար, ովքեր անգամ սիրողական մակարդակով ցանկանում են սահել օլիմպիական արդեն իսկ լեգենդար սառույցի վրա:
Օլիմպիական խաղերի ավարտից հետո ոչ բոլոր երկրներին է հաջողվում պահպանել սպորտային կառույցները, սակայն Չինաստանը կարողացել է պահպանել սպորտային ենթակառուցվածքները և դրանք ծառայեցնում է երկրում սպորտի մասսայականացմանը: