Կստեղծվի 100 տոկոս պետական ֆինանսավորմամբ 5-8 բուհ. ոլորտում կիրականացվեն ծավալուն բարեփոխումներ
3 րոպեի ընթերցում
ԵՐԵՎԱՆ, 28 ՀՈՒԼԻՍԻ, ԱՐՄԵՆՊՐԵՍ: «Կրթության մինչև 2030 թվականը զարգացման պետական ծրագիրը հաստատելու մասին» ՀՀ օրենքի նախագծով նախատեսվում է բոլոր բուհերի համար սահմանել միջազգայնորեն ընդունելի միասնական, լիցենզավորման և հավաստագրման ստանդարտներ՝ ըստ ենթակառուցվածքների, ընդհանուր տարածքի, կառավարման և այլ չափանիշների: «Արմենպրես»-ի հաղորդմամբ՝ ՀՀ կրթության, գիտության, մշակույթի և սպորտի նախարարի տեղակալ Արթուր Մարտիրոսյանը նախագիծը ներկայացնելիս, նշեց, որ կներդրվեն որակի ապահովման միասնական գործիքներ:
«Նախատեսվում է բուհերի համար ստեղծել հավասար մրցակցային դաշտ, մասնավորապես, մշակել բուհերի միասնական կազմակերպաիրավական ձև, նույնականացնել կառավարման համակարգը: Հատուկ ուշադրություն է դարձվելու կրթական ծրագրերին՝ հիմք ընդունելով աշխատաշուկայի պահանջները: Նախատեսվում է ներդնել աշխատաշուկայի պահանջներին համապատասխան նոր կրթական ծրագրեր, կվերանայվի մասնագիտությունների ցանկը»,-ասաց Արթուր Մարտիրոսյանն՝ ավելացնելով, որ կներդրվեն պետական պատվերի ձևավորման միջնաժամկետ և երկարաժամկետ պլանավորման ինստիտուցիոնալ մեխանիզմներ:
Ակնկալվում է, որ մասնագիտական և բարձրագույն կրթության համակարգի յուրաքանչյուր շրջանավարտ կունենա միջազգայնորեն ճանաչելի և աշխատաշուկայի կարիքներին համապատասխան մասնագիտական որակավորում, որը հնարավորություն կտա կարճ ժամկետում ձեռք բերել արժանապատիվ աշխատանք կամ սկսել սեփական գործը:
«Արմատական բարեփոխումների գործընթացում պետք է առանձնացնել պետական բուհերի խոշորացումը գիտահետազոտական ինստիտուտների հետ, որն արվում է հետազոտությունների որակի և մրցունակության բարձրացման նպատակով: Կստեղծվի 100 տոկոս պետական ֆինանսավորմամբ 5-8 բուհ՝ չբացառելով վճարովի ուսուցման հնարավորությունը: Հայաստանյան կոնկրետ թվով բուհերին, պետական թիրախային աջակցության միջոցով, հնարավորություն կընձեռվի միջազգային մրցակցության պայմաններում էականորեն բարելավել մեր դիրքերը: Արդյունքում, 2030 թվականին 4 հայաստանյան բուհ ընդգրկված կլինի միջազգային վարկանիշային աղյուսակների լավագույն 500-ի ցանկում»,-ասաց Արթուր Մարտիրոսյանը:
ՀՀ վարչապետի աշխատակազմի ղեկավար Արայիկ Հարությունյանը նշեց, որ գործադիրն ընդունում է կարևոր փաստաթուղթ, որի առնչությամբ երկար և համակողմանի աշխատանք է արվել:
«Փաստաթղթին ծանոթացողը կմտածի, որ 8 տարիների ընթացքում բարդ է այս ամենն իրականացնելը, բայց վերջին 4 տարիներին կրթության ոլորտում արվող քայլերին ծանոթ մարդը կհասկանա, որ շատ ուղղություններով արդեն բավական աշխատանք արվել է, առաջ գնացել ենք: Այս փաստաթղթում ամփոփել ենք բոլոր ուղղություններով արվող աշխատանքը ու ներկայացրել ենք մեր՝ մինչև 2030 թվականի տեսլականը: Կարծում եմ՝ ստացել ենք ամփոփ փաստաթուղթ»,- ասաց Արայիկ Հարությունյանը: