2 րոպեի ընթերցում
ԵՐԵՎԱՆ, 17 ՀՈՒՆԻՍԻ, ԱՐՄԵՆՊՐԵՍ: Հայաստանի Հանրապետության կառավարությունը ՀՀ կրթության, գիտության, մշակույթի և սպորտի նախարարության 2022 թվականի հաստատված բյուջեն կավելացնի 338 միլիոն 100 հազար դրամով:
«Արմենպրես»-ի հաղորդմամբ՝ Կրթության, գիտության, մշակույթի և սպորտի նախարար Վահրամ Դումանյանն ասաց, որ կառավարության որոշման նախագիծը բխում է Հայաստանի ֆեդերացիաների 2022 թվականի օրացուցային պլանով նախատեսված աշխարհի և Եվրոպայի առաջնություններին և «Փարիզ-2024» օլիմպիական խաղերին նախապատրաստվելու և վարկանիշային մրցաշարերին մասնակցելու նպատակով օլիմպիական խաղերի, աշխարհի և Եվրոպայի առաջնությունների հաղթողներին և մրցանակակիրներին,Օլիմպիական խաղերի, աշխարհի առաջնությունների 4-8-րդ տեղերը զբաղեցրած մարզիկներին, ինչպես նաև օլիմպիական խաղերի ծրագրում ընդգրկված մարզաձևերի Հայաստանի Հանրապետության հավաքական թիմերի մարզիչներին ու բժիշկներին (մերսող) սպորտային նպաստ հատկացնելու անհրաժեշտությունից:
Վարչապետ Նիկոլ Փաշինյանը նշեց, որ սպորտը կարևոր է բոլոր առումներով:
«Ցավոք, սպորտի ներկայացուցիչներին աջակցության համակարգը ինստիտուցիոնալ չի եղել: Դրանք եղել են հատվածական, շատ դեպքերում հայեցողական, և մենք որոշել ենք համակարգը դարձնել ինստիտուցիոնալ»,- ասաց Փաշինյանը: