Մահացել է Գերագույն խորհրդի նախկին պատգամավոր, նախկին նախարար Յուրի Ջավադյանը

ԵՐԵՎԱՆ, 20 ՄԱՅԻՍԻ, ԱՐՄԵՆՊՐԵՍ: 87 տարեկանում մահացել է ՀՀ Գերագույն խորհրդի նախկին պատգամավոր, Գյուղատնտեսության նախկին նախարար Յուրի Լևոնի Ջավադյանը: Ինչպես տեղեկացնում է «Արմենպրես»-ը, «Ֆեյսբուք»-ի իր էջում այս մասին հայտնել է «Որոտան» թերթի խմբագիր Արևհատ Ամիրյանը:

Յուրի Ջավադյանը ծնվել է 1935 թվականի հունվարի 1-ին Սիսիանի շրջանի Բնունիս գյուղում:

Բնունիսի յոթնամյա դպրոցը գերազանցությամբ ավարտելուց հետո, 1949 թ. ընդունվել է Երևանի հիդրոմելիորատիվ տեխնիկումի հողաշինարարական բաժին, գերազանցության դիպլոմով ավարտել 1954 թ.: Նույն թվականին ընդունվել է Երևանի Գյուղատնտեսական ինստիտուտի Հիդրոմելիորատիվ ֆակուլտետ, ավարտել 1959 թվականին` ստանալով ինժեներ-հիդրոտեխնիկի մասնագիտություն:

1997թ.-ից տեխնիկական գիտությունների թեկնածու է:

1959 թ. աշխատանքի է ընդունվել Երևան քաղաքի նախկին Լենինյան շրջանի թիվ 2 բնակարանային շահագործման գրասենյակում՝ որպես ինժեներ, նույն թվականին նշանակվել է բնակարանային տնտեսության վարչության գլխավոր ինժեներ:

1963 թ. նշանակվել է կոմունալ վարչության պետ, գործկոմի նախագահի տեղակալ:

Ընտրվել է նախկին Լենինյան շրջգործկոմի նախագահի առաջին տեղակալ, 1971 թվականին ղեկավարել է կրթության և կապիտալ շինարարության, ջրամատակարարման, ջերմամատակարարման աշխատանքները:

1974 թվականին ընտրվել է նախկին Լենինյան շրջանի գործադիր կոմիտեի նախագահ, 1976-1986թ.թ.` Երևանի քաղխորհրդի նախագահի առաջին տեղակալ:

1986-1990 թթ. եղել Հայաստանի Հանրապետության Ջրային տնտեսության և մելիորացիայի նախարար:

Հայաստանի Հանրապետության ջրային տնտեսության և մելիորացիայի մինիստրությունը Գյուղատնտեսության մինիստրությանը միանալուց հետո, 1990 թ. նոյեմբերից մինչև 1991 թ. հունվար ամիս աշխատել է որպես ՀՀ գյուղնախարարի առաջին տեղակալ, 1991 թ. հունվարից մինչև 1992 թ. վերջ` գյուղնախարար:

1992-1995 թթ. աշխատել է որպես ՀՀ գյուղնախարարի տեղակալ:

1995-1997թթ. աշխատել է «Հայջրնախագիծ ինստիտուտ» ՓԲԸ-ում՝ որպես տնօրեն:

1997-2000 թթ. աշխատել է որպես ՀՀ գյուղատնտեսության նախարարության Բարեփոխումների և սպասարկման գլխավոր վարչության պետ, նախարարի գլխավոր խորհրդական, կոլեգիայի անդամ:

2000-2001 թթ. աշխատել է «Հայջրնախագիծ ինստիտուտ» ՓԲԸ-ում՝ որպես տնօրենի տեղակալ:

2001-2018 թ.թ. աշխատել է «Հայջրնախագիծ ինստիտուտ» ՓԲԸ-ում՝ որպես տնօրեն:

2018-ից աշխատում էր «Հայջրնախագիծ ինստիտուտ» ՓԲԸ-ում՝ որպես խորհրդի նախագահ և ընկերության ընդհանուր ծրագրերի ղեկավար: