Ուկրաինայի հայերի միությունը շարունակում է ուղիներ գտնել Մարիուպոլի բնակիչներին օգնելու համար
1 րոպեի ընթերցում
ԵՐԵՎԱՆ, 22 ՄԱՐՏԻ, ԱՐՄԵՆՊՐԵՍ: Ուկրաինայի հայերը չեն հրաժարվում Մարիուպոլի բնակիչներին օգնելու փորձերից։ Ինչպես հաղորդում է «Արմենպրես»-ը՝ վկայակոչելով AnalitikaUA.net պարբերականը, այս մասին նշել է Ուկրաինայի հայերի միության ներկայացուցիչ Ռուբեն Մակարյանը:
Նրա խոսքով՝ բոլոր հնարավոր ուղիներով Մարիուպոլ են բերվում պարենամթերք և վառելիք։ Քաղաք է բերվում մարդասիրական օգնություն, իսկ վերադարձի ճանապարհին բնակիչները տարհանվում են։
«Վարորդները, անձնական մեքենաներով և միկրոավտոբուսներով, գնդակոծության տակ, վտանգելով իրենց կյանքը, բերում են անհրաժեշտ պարագաներ: Առանձնահատուկ վառելիքի պակաս կա»,- ասաց նա՝ հավելելով, որ եթե կան Մարիուպոլի բնակիչներին օգնել ցանկացողներ, կարող են դիմել Դոնեցկի մարզում ինքնակառավարման մարմնի ներկայացուցիչներին: