Ազգային ժողովն արտահերթ նիստ կգումարի

ԵՐԵՎԱՆ, 4 ՄԱՐՏԻ, ԱՐՄԵՆՊՐԵՍ: ՀՀ ազգային ժողովը մարտի 9-ին կգումարի արտահերթ նիստ: «Արմենպրես»-ի հաղորդմամբ՝ այս մասին հայտնում են Ազգային ժողովից:

Նիստը կգումարվի՝ ԱԺ նախագահի որոշմամբ, Հայաստանի Հանրապետության Սահմանադրության 100-րդ եւ «Ազգային ժողովի կանոնակարգ» սահմանադրական օրենքի 41-րդ հոդվածների համաձայն` կառավարության նախաձեռնությամբ: Արտահերթ նիստը կանցկացվի մարտի 9-ին ժամը 11:00-ին:

Օրակարգում ընդգրկված է օրենսդրական երկու նախաձեռնություն՝ «Ծխախոտային արտադրատեսակների եւ դրանց փոխարինիչների օգտագործման հետեւանքով առողջությանը հասցվող վնասի նվազեցման եւ կանխարգելման մասին» օրենքում լրացում կատարելու մասին և «Հայաստանի Հանրապետության ու Արժույթի միջազգային հիմնադրամի միջեւ 2022 թվականի հունվարի 11-ին եւ հունվարի 18-ին ստորագրված «Պահուստային ծրագրի միջոցների օգտագործման մասին» նամակ-համաձայնագիրը վավերացնելու մասին օրենքների նախագծերը: