396.99
Վարչապետը շնորհավորական ուղերձ է հղել Կիպրոսի Անկախության օրվա կապակցությամբ
2 րոպեի ընթերցում
ԵՐԵՎԱՆ, 1 ՀՈԿՏԵՄԲԵՐԻ, ԱՐՄԵՆՊՐԵՍ: Վարչապետ Նիկոլ Փաշինյանը շնորհավորական ուղերձ է հղել Կիպրոսի Հանրապետության նախագահ Նիկոս Անաստասիադիսին Հանրապետության Ազգային տոնի՝ Անկախության օրվա կապակցությամբ:
Ինչպես «Արմենպրես»-ին հայտնում եմ վարչապետի աշխատակազմից, ուղերձում, մասնավորապես, ասված է.
«Հայաստանի Հանրապետության կառավարության և անձամբ իմ անունից ի սրտե շնորհավորում և լավագույն մաղթանքներ եմ հղում Ձեզ և Կիպրոսի բարեկամ ժողովրդին՝ Հանրապետության Ազգային տոնի՝ Անկախության օրվա կապակցությամբ:
Գոհունակությամբ եմ փաստում, որ մեր բազմադարյա կապերի և ամուր բարեկամության վրա հիմնված հայ-կիպրական հարաբերությունները շարունակում են զարգանալ եղբայրության և փոխըմբռնման ոգով:
Սիրելի բարեկամ, իմ խորին երախտագիտությունն եմ հայտնում Ձեզ, Կիպրոսի բարձրագույն իշխանություններին և կիպրացի եղբայրական ժողովրդին՝ այս դժվարին պահին վերստին հայ ժողովրդի կողքին լինելու, Հայաստանի դեմ ադրբեջանա-թուրքական ագրեսիայի դատապարտման հարցում Կիպրոսի անվերապահ աջակցությունը վերահաստատելու համար: Ձեր անկեղծ և անդրդվելի դիրքորոշումը կրկին վկայում է հայ և կիպրացի ժողովուրդների անսասան բարեկամության մասին:
Հայաստանը և Կիպրոսը մշտապես հանձնառու են ընդլայնելու և խորացնելու համագործակցությունն ինչպես երկկողմ, այնպես էլ բազմակողմ հարթակներում:
Մեծարգո պարոն նախագահ, մաղթում եմ Ձեզ քաջառողջություն և արգասաբեր գործունեություն, իսկ Կիպրոսի եղբայրական ժողովրդին՝ բարեկեցություն և խաղաղություն»:
Բաժանորդագրվեք մեր ալիքին Telegram-ում