ՀՀ վարչապետը երկօրյա պաշտոնական այցով կմեկնի Վրաստան

ԵՐԵՎԱՆ, 7 ՍԵՊՏԵՄԲԵՐԻ, ԱՐՄԵՆՊՐԵՍ:Նիկոլ Փաշինյանը 2021 թվականի սեպտեմբերի 8-9-ը պաշտոնական այց կկատարի Վրաստան:

«Այցի շրջանակում Հայաստանի վարչապետը հանդիպումներ կունենա Վրաստանի վարչապետ Իրակլի Ղարիբաշվիլիի և նախագահ Սալոմե Զուրաբիշվիլիի հետ»,- «Արմենպրես»-ի փոխանցմամբ՝ նշված է ՀՀ կառավարության տարածած հաղորդագրության մեջ:

Նախատեսվում են հայ-վրացական բարձր մակարդակի բանակցություններ, որից հետո Հայաստանի և Վրաստանի վարչապետները հանդես կգան զանգվածային լրատվության միջոցների համար հայտարարություններով:

Այցի շրջանակում Նիկոլ Փաշինյանը նաև հարգանքի տուրք կմատուցի Թբիլիսիի «Հերոսների» հրապարակում: