2 րոպեի ընթերցում
ԵՐԵՎԱՆ, 6 ԱՊՐԻԼԻ, ԱՐՄԵՆՊՐԵՍ: Հայաստանում փետրվար ամսին միջին աշխատավարձը ավելացել է շուրջ 11 հազարով, իսկ նախորդ տարվա նույն ամսվա նկատմամբ աշխատատեղերի թիվը պակասել է 8000-ով:
«Արմենպրես»-ի հաղորդմամբ՝ այս մասին ԱԺ ֆինանսավարկային և բյուջետային հարցերի մշտական հանձնաժողովի նիստում ասաց ՊԵԿ նախագահ Էդվարդ Հովհաննիսյանը:
Նա հիշեցրեց, որ 2020-ի ընթացքում միջին աշխատավարձի դաշտում տեղի են ունեցել փոփոխություններ, դրանք շարունակվում են նաև 2021-ի ընթացքում : «Մասնավորապես, վերջին տվյալներով՝ փետրվար ամսվա միջին աշխատավարձի տարբերությունը կազմել է 11 հազար դրամ՝ 193 հազարից դառնալով 204 հազար դրամ: Մենք ուսումնասիրել ենք նախ աշխատատեղերի տարբերությունը: Թիվը 8000-ով պակաս է, քան անցյալ տարի՝ համեմատելի ամսում: Այդ 8000 աշխատատեղերը բաժին են ընկնում համավարակի հետևանքով խոցելի ոլորտներին՝ հասարակաակն սնունդ, կացության կազմակերպում, հյուրանոցային տնտեսություններ»,- ասաց Հովհաննիսյանը:
Մինչև 150 հազար դրամ և 150 հազար դրամից ավելի աշխատավարձերի սեգմենտներում տեղի է ունեցել հետևյալ փոփոխությունը. ավելի շատ աշխատավարձի բաձրացումը տեղի է ունեցել հենց այդ շեմի շրջակայքում. մինչև 150 հազար ստացողներինը բարձրացել է 150-ից ավելի, առավել բարձր դաշտերում՝ 200-ից ավելի: ՊԵԿ նախագահը սա պայմանավորեց իրենց վարչարարության արդյունավետությամբ, որի արդյունքում աշխատավարձերի չափերը հնարավորինս ճիշտ են ներկայացվել հարկային հաշվարկներում: «Ինչպես նաև իրենց ազդեցությունն են ունեցել կառավարության կողմից բազմաթիվ միջոցառումներով տնտեսավարողներին և աշխատակիցներին տրամադրված գումարները»,- նշեց Հովհաննիսյանը: