Փաշինյանը հայտնեց Շիրակ այց կատարելու և գերիների հարազատների հետ հանդիպելու մտադրության մասին
2 րոպեի ընթերցում
ԵՐԵՎԱՆ, 10 ՓԵՏՐՎԱՐԻ, ԱՐՄԵՆՊՐԵՍ: ՀՀ վարչապետ Նիկոլ Փաշինյանը մտադիր է առաջիկայում այց կատարել Շիրակի մարզ և հանդիպել Ադրբեջանում պահվող գերիների հարազատներին: «Արմենպրես»-ի փոխանցմամբ` այս մասին Փաշինյանն ասաց Ազգային ժողովում կառավարության հետ հարցուպատասխանի ընթացքում, պատասխանելով «Իմ քայլը» խմբակցության անդամ Նազելի Բաղդասարյանի հարցին:
«Դժգոհություն կա ոչ միայն Շիրակի մարզում, դժգոհություն կա նաև կառավարությունում: Բոլորս էլ դժգոհ ենք: Պլանավորում ենք մենք այց Շիրակի մարզ, որտեղ տարբեր հանդիպումներ կունենանք քաղաքացիների հետ, այդ թվում` գերիների հարազատների հետ: Ուզում եմ անել հավաստիացում` գերիների խնդրի մասին մեզ հիշեցնելու անհրաժեշտություն չկա, որովհետև մենք ոչ մի վայրկյան այդ խնդրի մասին չենք մոռանում: Այդ խնդրի հետ կապված մեզ որևէ գործողության դրդելու համար ակցիա անելու անհրաժեշտություն չկա»,- նշեց վարչապետը:
Փաշինյանը նշեց, որ գերիների հետ կապված հարցում պետք է առաջնորդվել չվնասելու սկզբունքով:
«Մենք այս ընթացքում էլ համոզվեցինք, որ եղել են մի շարք գործողություններ, որոնք թվացել է, որ տեղի են ունենում ի նպաստ խնդրի շուտափույթ լուծման, բայց գործնականում հակառակն է տեղի ունեցել»,- ասաց Նիկոլ Փաշինյանը:
Հայ գերիներին հայրենիք վերադարձնելու ուղղությամբ աշխատանքներն ընթանում են ամենօրյա ռեժիմով. Ադրբեջանն առայսօր վերադարձրել է գերության մեջ գտնվող 69 անձի:
