2 րոպեի ընթերցում
ԵՐԵՎԱՆ, 24 ՀՈԿՏԵՄԲԵՐԻ, ԱՐՄԵՆՊՐԵՍ: Ի հեճուկս պատերազմի, թուրք-ադրբեջանական վայրագությունների, կյանքը Արցախում կանգ չի առնում. Շուշիի Ղազանչեցոց Սուրբ Ամենափրկիչ եկեղեցում հոկտեմբերի 24-ին պսակադրություն է եղել:
Ամուսնացողները լրագրող Մարիամ Սարգսյանը և կամավոր Հովիկ Հովսեփյանն են:Արցախի Հանրապետության նախագահ Արայիկ Հարությունյանն ընդգծում է. «Պատերազմին զուգահեռ` Արցախում կյանքը շարունակվում է: Իսկ Հովիկի և Մարիամի` այսօր Շուշիի Ղազանչեցոցում տեղի ունեցած պսակադրության արարողությունն առաջին հերթին ուղերձ է` ուղղված ողջ քաղաքակիրթ աշխարհին` օր առաջ պետք է դադարեն կրակել թնդանոթները... Երջանի՛կ լինեք»:
«Արմենպրես»-ի հետ զրույցում՝ ՀՀ ԱԺ «Իմ քայլը» խմբակցության պատգամավոր Գայանե Աբրահամյանը, որը մասնակցել է պսակադրությանը, տեղեկացրեց, որ արարողությունը հայտնվել է նաև Արցախում գտնվող միջազգային լրատվամիջոցների շատ ներկայացուցիչների ուշադրության կենտրոնում, նրանք ներկա են եղել, տեսանկարահանել:
«Շատ կարևոր էր որպես ուղերձ, որ որևէ կերպ չենք դադարելու ապրել մեր բնականոն կյանքով, որևէ կերպ պատերազմը մեզ չի կանգնեցնելու: Երկու հրաշալի երիտասարդներ են ամուսնացողները: Իրենք ասում էին, որ սա հենց իրենց կոչն է, որ որևէ կերպ չեն դադարելու ապրել բնականոն կյանքով»,-ասաց Աբրահամյանը:
Սեպտեմբերի 27-ից սկսած պատերազմական գործողությունների ընթացքում հոկտեմբերի 8-ին Ադրբեջանի Զինված ուժերը երկու անգամ հրթիռակոծել են Շուշիի Սուրբ Ղազանչեցոց եկեղեցին:
Աննա Գրիգորյան