1 րոպեի ընթերցում
ԵՐԵՎԱՆ, 2 ՀՈԿՏԵՄԲԵՐԻ, ԱՐՄԵՆՊՐԵՍ: Ադրբեջանի զինված ուժերի կողմից հոկտեմբերի 2-ի երեկոյան Ստեփանակերտին հասցրած հրթիռային հարվածների հետևանքով մեկ մարդ զոհվել է, կա 4 վիրավոր:«Արմենպրես»-ի հաղորդմամբ` մամուլի ասուլիսի ժամանակ այս մասին ասաց Արցախի մարդու իրավունքների պաշտպան Արտակ Բեգլարյանը:
Նրա խոսքով` երկու բնակելի շենք Ստեփանակերտում լուրջ վնասվել են և, բարեբախտաբար, շենքերում այդ պահին քիչ մարդ է եղել. դրա արդյունքում վիրավորների քանակը ավելի քիչ է:
ՄԻՊ-ը հիշեցրեց, որ մինչ այդ Ստեփանակերտում հրթիռակոծվել էր ԱԻ պետական ծառայության շենքը, որը լրջորեն վնասվել էր:
«Ակնհայտ է, որ դիտավորյալ թիրախավորված կերպով է եղել հարվածը, հաշվի առնելով հրթիռների դիպուկության աստիճանը: Հարվածի հետևանքով 7 վիրավորներ կան քաղաքացիական բնակչության ու ծառայության աշխատակիցների շրջանում: Վիրավորներից մի քանիսը բավականին ծանր վիճակում են գտնվում: Այստեղ կարևոր է ընդգծել, որ Ադրբեջանը նպատակային կերպով թիրախավորել է մարդասիրական գործառույթ իրականացնող մարմին»,- ասաց Բեգլարյանը: