4 րոպեի ընթերցում
ԵՐԵՎԱՆ, 24 ՍԵՊՏԵՄԲԵՐԻ, ԱՐՄԵՆՊՐԵՍ: «Ալագյազ» զորավարժարանում «Կովկաս-2020» ռազմավարական հրամանատարաշտաբային զորավարժության կրակային փուլի ընթացքում ՀՀ զինված ուժերը հարձակվեցին պայմանական հակառակորդի վրա: Կատարված աշխատանքի արդյունքները կամփոփվեն ավելի ուշ: Զորավարժությանը մասնակցում էին ՀՀ ԶՈւ և ՌԴ Հարավային ռազմական օկրուգի ստորաբաժանումները:
Ինչպես հաղորդում է «Արմենպրես»-ը, լրագրողների հետ զրույցում հայ-ռուսական միացյալ խմբավորման հրամանատար, գեներալ-մայոր Տիգրան Փարվանյանն ասաց, որ զորավարժության արդյունքները կամփոփի մի փոքր ուշ:
«Զորավարժությունները մեկնարկել են սեպտեմբերի 21-ին և շարունակվելու են մինչև սեպտեմբերի 26-ը: Այսօր ավարտվեց կրակային փուլը, կլինեն մարդիկ, ովքեր կխրախուսվեն: Սպասում եմ ստորաբաժանումների հրամանատարների զեկույցներին, թե ովքեր են աչքի ընկել, ինչպիսի խոցումներ են եղել, որպեսզի խրախուսումները լինեն ըստ արժանվույն»,- նշեց Փարվանյանը և հավելեց, որ զինծառայողները լավ են կատարել իրենց առջև դրված մարտական խնդիրը:
Նրա խոսքով՝ զորավարժությունների ընթացքում պայմանական հակառակորդը «խախտել էր» սահմանը, հայկական կողմը «հետ է շպրտել» հակառակորդին և «վերականգնել» պետական սահմանը:
Հայ-ռուսական համատեղ զորավարժությունների կարևորության մասին խոսելիս գեներալ-մայորն ասաց, որ հնարավոր է դառնում զորախմբում գործել մեկ հրամանատարության ներքո:
«Այստեղ կա ներդաշնակություն. և՛ հայկական կողմը, և՛ ռուսականը երկուստեք շատ համահունչ գործեցին: Ես գոհ եմ այսօրվա իրականացված զորավարժությունից»,- ընդգծեց Փարվանյանը և հավելեց, որ եղել են նաև թերություններ, չնայած դրանք չնչին են եղել և ոչ այդքան նկատելի:
Տանկային անձնակազմերը զորավարժությունների կրակային փուլում կիրառեցին ժամանակակից զինված բախումների մարտական փորձը և, օգտագործելով մարտավարական հնարքներ, ոչնչացրին պայմանական հակառակորդի զրահատեխնիկան:
Կրակի կառավարումն ապահովեցին անօդաչու թռչող սարքերի հաշվարկները: «Կովկաս-2020» զորավարժությունների կրակային փուլի շրջանակներում հարվածային Մի-24Պ և գրոհային Մի-8ՄՏ ուղղաթիռների ներգրավմամբ հետախույզները դեսանտավորվեցին պայմանական թշնամու տարածքում: Հաղթահարելով ջրային պատնեշը, նրանք ներթափանցեցին պայմանական ահաբեկչական բազա, առգրավեցին գաղտնի փաստաթղթեր և գերեվարեցին «լեզու»:
Գործնական վարժանքներին մասնակցեցին հրաձգային, հրետանային, տանկային, ավիացիոն և հակաօդային պաշտպանության ուժեր և միջոցներ:
Զորավարժությունների ընթացքում խաղարկվեցին պաշտպանության և հակահարձակման էլեմենտներ, կատարելագործվեց ստորաբաժանումների ղեկավարումը համատեղ խնդիրների կատարման ժամանակ, հստակեցվեց փոխգործակցությունը ռազմական անվտանգության ապահովման առումով:
Հայաստանում «Կովկաս -2020» զորավարժություններում ներգրավված է ավելի քան 1․5 հազար մարդ և շուրջ 300 միավոր ռազմական տեխնիկա։
Լիլիթ Դեմուրյան