Արցախի նախագահը Քաշաթաղի շրջանի ղեկավարին աշխատանքից ազատել է պաշտոնեական դիրքի չարաշահման համար
1 րոպեի ընթերցում
![Արցախի նախագահը Քաշաթաղի շրջանի ղեկավարին աշխատանքից ազատել է պաշտոնեական դիրքի չարաշահման համար](http://armenpress.am/resized/480/static/news/b/2020/08/1025786.jpg)
ԵՐԵՎԱՆ, 25 ՕԳՈՍՏՈՍԻ, ԱՐՄԵՆՊՐԵՍ: Արցախի նախագահ Արայիկ Հարությունյանը Քաշաթաղի շրջանի վարչակազմի ղեկավար Արտյոմ Սարիբեկյանին աշխատանքից ազատել է պաշտոնեական դիրքի չարաշահման համար:
«Արմենպրես»-ի փոխանցմամբ՝ այս մասին Հարությունյանը գրել է «Ֆեյսբուքի» իր էջում:
«Այսօր Քաշաթաղի շրջանի վարչակազմի ղեկավար Արտյոմ Սարիբեկյանին աշխատանքից ազատելու մասին կառավարության որոշում եմ հաստատել, իսկ պատճառն իմ հանձնարարականին չհետևելն է՝ պաշտոնեական դիրքի չարաշահմամբ որդուն իր ենթակայությամբ վարչակազմի աշխատակազմում գործի ընդունելը: Նորից եմ դիմում պետական բարձրաստիճան պաշտոնյաներին. բոլոր հանձնարարականներիս կատարման հարցում լինելու եմ հետևողական, իսկ ձեր խնդիրը Հայրենիքին բարեխղճորեն ծառայելն է միայն»,- գրել է Հարությունյանը:
Նախագահը նշել է, որ այլապես միասին աշխատելու եզրեր չեն լինի: