Էստոնիան Լոռու բուժհաստատություններին բժշկական պարագաներ և անհատական պաշտպանիչ միջոցներ է տրամադրում
2 րոպեի ընթերցում
ԵՐԵՎԱՆ, 10 ՀՈՒՆԻՍԻ, ԱՐՄԵՆՊՐԵՍ: Էստոնիան Լոռու մարզի բժշկական հաստատություններին բժշկական պարագաներ և անհատական պաշտպանիչ միջոցներ է տրամադրում: «Արմենպրես»-ի փոխանցմամբ՝ այս մասին «Ֆեյսբուք»-ի իր էջում ՀՀ նախագահ Արմեն Սարգսյանի հետ ունեցած հեռախոսազրույցից հետո գրել է Էստոնիայի Հանրապետության նախագահ Կերստի Կալյուլայդը:
«Այսօր հեռախոսազրույց եմ ունեցել Հայաստանի Հանրապետության նախագահ Արմեն Սարգսյանի հետ: Էստոնիան աջակցում է Հայաստանին՝ Լոռու մարզի բժշկական հաստատությունների համար բժշկական պարագաներ և պաշտպանիչ միջոցներ գնելու միջոցով»,- գրել է Կալյուլայդը:
Նախագահները հեռախոսազրույցի ընթացքում տեղեկություններ են փոխանակել երկու երկրներում կորոնավիրուսի համավարակի հետ կապված իրավիճակի, դրա կանխարգելմանն ու հաղթահարմանն ուղղված միջոցառումների շուրջ, քննարկել համագործակցության հնարավորությունները համավարակի դեմ պայքարում:
Նախագահ Սարգսյանը շնորհակալություն է հատնել Էստոնիայի նախագահին՝ «Հայաստանի մանուկներ» հիմնադրամին (COAF) 30 հազար եվրո տրամադրելու համար, որն ուղղվելու է համավարակի դեմ պայքարին և համապատասխան բժշկական պարագաների ձեռքբերմանը:
Հայաստանի և Էստոնիայի նախագահներն անդրադարձել են նաև երկկողմ հարաբերությունների զարգացմանը՝ մասնավորապես ընդգծելով տեխնոլոգիաների, արհեստական բանականության, գիտատեխնիկական, կրթական ոլորտներում երկու երկրների համագործակցության մեծ ներուժի առկայությունն, այդ թվում նաև՝ նախագահական ATOM նախաձեռնության շրջանակում փոխգործակցությունը: Այս համատեքստում նշվել է, որ նախագահ Արմեն Սարգսյանի՝ աշնանը Էստոնիա նախատեսվող պաշտոնական այցը նոր խթան կլինի երկու բարեկամ երկրների համագործակցության խորացմանը: