3 րոպեի ընթերցում
ԵՐԵՎԱՆ, 16 ԱՊՐԻԼԻ, ԱՐՄԵՆՊՐԵՍ: Կառավարության նիստի մեկնարկին վարչապետ Նիկոլ Փաշինյանը շնորավորեց Ոստիկանության ծառայողներին մասնագիտական օրվա կապակցությամբ։
Դիմելով Ոստիկանության պետ Արման Սարգսյանին՝ վարչապետը նշեց. «Պարոն Սարգսյան, թույլ տվեք ձեզ և ոստիկանության ողջ անձնակազմին շնորհավորել այս կարևոր տոնի կապակցությամբ: Ոստիկանությունը ցանկացած պետության, ինչպես նաև մեր պետության իրավակարգի պահպանության կարևորագույն ինստիտուտներից մեկն է, և, իհարկե, նրա որակյալ աշխատանքից է կախված երկրում մարդու իրավունքների պաշտպանության, ժողովրդավարության, ընդհուպ մինչև տնտեսական ու քաղաքական ազատությունների պահպանման և կիրառելիության մակարդակը: Պետք է խոստովանել, որ ՀՀ-ում ոստիկանության և հանրության հարաբերությունները պարզ չեն եղել, ունեցել են բազմաթիվ բարդություններ, նույնիսկ ճգնաժամեր, և այսօր մեր մեծագույն խնդիրն է հաստատել լիարժեք փոխվստահություն, լիարժեք վստահություն ոստիկանության աշխատանքի նկատմամբ: Դա մեր օրակարգի կարեւորագույն խնդիրներից է»։
«Արմենպրես»-ի հաղորդմամբ, կառավարության ղեկավարը նաև տեղեկացրեց, որ երկար ժամանակ իշխանությունները քննարկում են ոստիկանության բարեփոխումների ռազմավարությունը: «Ճիշտն ասած, արդեն ապրիլի 1-ից պետք է սկսեին գործողություններ այդ ուղղությամբ, բայց համաճարակը որոշակի սրբագրումներ մտցրեց, այնուամենայնիվ բարեփոխումները շարունակվում են մնալ մեր օրակարգի կարեւոր առաջնահերթություններից մեկը: Այդ օրակարգում երկու կարևոր հենասյուն կա. առաջինը հանրության լիարժեք վստահությունը ոստիկանության նկատմամբ, և երկրորդը՝ ոստիկանության աշխատանքի արդյունավետությունը: Նաև կարևոր է այս համատեքստում ոստիկանության իմիջի բարեփոխումը: Ոստիկանությունն իսկապես պետք է փոխվի և պետք է փոխվի այնպես, որ համապատասխանի այսօրվա Հայաստանի պահանջներին, այն հավակնություններին, որ մեր պետությունն ու ժողովուրդը ձևակերպում է»,- ասաց վարչապետը՝ ավելացնելով, որ այսօրվա կարանտինային վիճակը հաշվի առնելով այսօր ոստիկանության օրը նշվելու է հնարավորինս սահմանափակ շրջանակում: Նիկոլ Փաշինյանը հույս հայտնեց, որ այս տարվա բաց թողնվածը հաջորդ տարի կլրացվի:
Այնուհետև վարչապետի կոչով կառավարության անդամները մեկ րոպե լռությամբ հոտնկայս հարգեցին բոլոր այն ոստիկանների հիշատակը, որոնք զոհվել են Հայաստանի օրենքը, իրավունքը, իրավակարգը պաշտպանելիս: