3 րոպեի ընթերցում
ԵՐԵՎԱՆ, 27 ԴԵԿՏԵՄԲԵՐԻ, ԱՐՄԵՆՊՐԵՍ: ՀՀ տնտեսական մրցակցության պաշտպանության պետական հանձնաժողովի կողմից իրականացված վարույթները 2019 թվականին ավելի շատ են եղել, քան 2018-ին: Ամփոփելով տարին՝ ՀՀ տնտեսական մրցակցության պաշտպանության պետական հանձնաժողովի նախագահ Գեղամ Գևորգյանը «Արմենպրես»-ի մամուլի սրահում հրավիրված ասուլիսում նշեց, որ այդ ակտիվությունը կապված է եղել քաղաքացիների, տնտեսավարողների դիմում-բողոքների հետ:
«Հանձնաժողովի կողմից նախաձեռնությունների քանակը մենք մի փոքր քչացրել էինք և փորձում էինք տեսնել, թե տնտեսավարողներն ինչպես են արձագանքում: Պարզվեց, որ տնտեսավարողների բողոքների քանակը բավական շատ է: Անբարեխիղճ մրցակցության հատվածում ունենք բողոքների ավելացում 10 տոկոսով: Հետաքրքրիր պատկեր է նկատվում խախտումների ավելի խորը ուսումնասիրությունների արդյունքում պատասխանատվության մեխանիզմների ներդրման համակարգում: Օրինակ՝ գերիշխող դիրքի չարաշահման և հակամրցակցային համաձայնությունների բացահայտման գործերի քանակը գրեթե երկուս ու կես անգամ ավելացել է»,-ասաց Գեղամ Գևորգյանը:
Նա տեղեկացրեց, որ հանձնաժողովն այս տարի պետական մարմինների նկատմամբ պատասխանատվության միջոցներ է կիրառել: Մասնավորապես՝դատական դեպարտամենտի, Առողջապահության նախարարության, Ոստիկանության: Նա տեղեկացրեց, որ խախտումներն, ըստ էության, մեծ չեն եղել, սակայն հանձնաժողովը ցույց է տալիս, որ տնտեսավարող սուբյեկտները կարող են նաև պետական մարմինների դեպքում համապատասխան միջոցների դիմել: Ներկայում հանձնաժողովը պետական գնումների ոլորտում մեծածավալ աշխատանք է իրականացնում:
Գեղամ Գևորգյանը նշեց, որ Հայաստանում տարածված խախտումներից է անբարեխիղճ մրցակցությունը: Այս տարի նման բացահայտված դեպքերից հանձնաժողովի նախագահն առանձնացրեց օղիների հետ կապված գործը, երբ այլ բրենդի ներքո է փորձ արվել ապրանքն իրացնել, դիալեզի սարքավորումների գնման հետ կապված խնդիր է եղել: Կաթնամթերքի ոլորտում հասարակության մոլորեցման դեպքեր ևս եղել են: Ներկայում հանձնաժողովը խորն ուսումնասիրություն է սկսում կաթնամթերքի, կարագի շուկայում, ամփոփումը կլինի հաջորդ ամսին:
«Այս պահին կարող եմ ասել, որ կարագի ոլորտում անբարեխիղճ մրցակցության դրսևորում բուսական յուղի օգտագործման տեսքով չի հայտնաբերվել»,-նշեց Գեղամ Գևորգյանը: