ԵՐԵՎԱՆ, 31 ՀՈԿՏԵՄԲԵՐԻ, ԱՐՄԵՆՊՐԵՍ: Հայաստանի Հանրապետության դրոշի գույներով կոնֆետի քանդակը մեկ ամիս շարունակ կզարդարի Փարիզի հայտնի Գեորգ V-ի պողոտան: «Արմենպրես»-ի փոխանցմամբ` այս մասին «Ֆեյսբուք»-ի իր էջում գրել և լուսանկար է հրապարակել Ֆրանսիայում Հայաստանի Հանրապետության դեսպանության դիվանագետ Հայկ Խեմչյանը:

«Լոուրենս Ջենկելի ստեղծագործությունները զարդարում են Փարիզի Գեորգ V-ի հայտնի պողոտան: Դրանք այնտեղ ցուցադրված կլինեն հոկտեմբերի 15-ից նոյեմբերի 14-ը»,- գրել է Խեմչյանը: Քանդակի հեղինակը եռագույն կոնֆետի արձանը հենց այդպես էլ անվանել է՝ «Կոնֆետ. Հայաստանի դրոշը»:

Ինչպես փոխանցում է Sortiraparis-ը` ցուցահանդեսի կազմակերպիչներից Ռեմի Մակինադիդջանայի խոսքով` ցուցադրությունը կոչված է դառնալ Փարիզի մշակույթի նոր էջի խորհրդանիշ: Այն բաց ցուցադրություն է, որը հնարավորություն է տալիս կոտրելու արդի մշակույթի վերաբերյալ կարծրատիպը, որը հաճախ համարվում է անհասանելի:

Պողոտայում բաց երկնքի տակ ներկայացված է 50 աշխատանք: