Ժամանակը Երևանում՝ 11:07:36,   21 Փետրվար

Վեպ, թե՞ ճանապարհորդական ձեռնարկ. Գրականագետները քննարկել են Նիկոլ Փաշինյանի «Երկրի հակառակ կողմը» ստեղծագործությունը

Վեպ, թե՞ ճանապարհորդական ձեռնարկ. Գրականագետները քննարկել են Նիկոլ Փաշինյանի «Երկրի հակառակ կողմը» ստեղծագործությունը

ԵՐԵՎԱՆ, 16 ՓԵՏՐՎԱՐԻ, ԱՐՄԵՆՊՐԵՍ: ՀՀ վարչապետ Նիկոլ Փաշինյանի «Երկրի հակառակ կողմը» գիրքը մեծ հետաքրքություն է վայելում ընթերցասերների շրջանում. ոմանք այն վեպ են համարում, ոմանք էլ՝ ճանապարհորդական ձեռնարկ, բայց քչերն են անտարբեր գրքի հանդեպ:

Գիրքը գրակա՞ն երևույթ է, թե՞ արտագրական, վե՞պ է, թե՞ վեպ չէ, Նիկոլ Փաշինյանը գրո՞ղ է, թե՞ ոչ և կամ գրքի բարձր վարկանիշը որքանո՞վ է պայմանավորված Նիկոլ Փաշինյան անձի հետ. հարցերի շուրջ փետրվարի 16-ին ՀՀ վարչապետ Նիկոլ Փաշինյանի ներկայությամբ խոսեցին գրական ոլորտի ներկայացուցիչները:

«Հեղինակը հաճախ հորինում է կամ զրոյից նոր աշխարհ է ստեղծում գրքում: Հետաքրքիր է. թե ինչպես են գրքում գրված տեքստերը հաճախ դառնում մեր լրատվական դաշտի մի մասը, թե ինչպես է վարչապետը մեջբերում ինքն իրեն»,-«Արմենպրես»-ի թղթակցի հետ զրույցում նշեց արձակագիր Գրիգը:

Արձակագիրը գրքի մեծաքանակ սպառումը պայմանավորեց նրանով, որ այսօր գրքի հեղինակը մեր երկրի վարչապետն է: «Մարդիկ ցանականում են մեկ այլ տեսանկյունից ճանաչել Փաշինյանին: Կարևոր է նաև պատումի եղանակր: Գիրքն այնպես է գրված, որ շատ զանգվածներ այն հասկանան: Ընթերցանությունը հավելյալ բարդություններ չի առաջացանում և, ի վերջո, այն զրույց է հենց ընթերցողի հետ: Բազմաթիվ հատվածներ կան տեքստում, երբ գրողն ուղղակի և անուղղակի դիմում է ընթերցողին: Ըստ իս՝ «Երկրի հակառակ կողմը» միանշանակ վեպ է»,-ընդգծեց նա:

Գրականագետ Հայկ Համբարձումյանի խոսքով՝ գրքում կա որոշակի գեղարվեստականություն, սկիզբն ասես դետեկտիվ պատում լինի: «Գրքի հանդեպ հետաքրքրությունն աստիճանաբար պակասում է, երբ դու տեսնում ես ճանապարհորդական պատումներ, անհատների ապրումներ: Գրքում հակահերոս չենք ունենում, և այն աստիճանաբար դառնում է խորհրդատվությունների մի շղթա՝  գեղեցիկ վայրերով, էրոտիկ տեսարաններով»,-ասաց նա:

Լրագրող Մհեր Արշակյանը շեշտեց, որ «Երկրի հակառակ կողմը» գիրքը գրականություն է այնքանով, որ այն գրվել է թաքստոցում: «Գրականությունն այս գրքի մեջ է այն գրողներով, որոնք կան գրքում՝ Կաֆկա, Սարոյան և այլք: Սա վավերագրություն է, ճամփորդություն խոհանոցում: Ընդհանուր առմամբ՝ հասկանալի է, որ սա հեղինակի ճամփորդությունը չէ երկրի հակառակ կողմով դեպի Հայաստան:  Հայաստանը պրիզմա է, որի միջով ճանապարհորդում է  աշխարհը: Սա աշխարհի ճանապարհորդությունն է Հայաստանում»,-նշեց Արշակյանը՝ նկատելով, որ գրքում տառապանք չկա, հերոսն անընդհատ ուտում է և խմում:

Վարչապետը լսեց գրականագետներին ու ասաց, որ նրանցից յուրաքանչյուրի խոսքում էլ ճշմարտություն կա, և որ ինքը գիրքը գրելիս կրել է համաշխարհային ճանաչում ունեցող մի շարք հեղինակների ստեղծագործությունների ազդեցությունը: 

Միջոցառումն անցկացվեց «Անտարես» հրատարակչության և «Լոֆթ»-ի նախաձեռնությամբ:

«Արմենպրես» պետական լրատվական գործակալության «Երևանյան բեսթսելեր» հեղինակային նախագծի «Հայ հեղինակներ» շարքում ամիսներ շարունակ ամենավաճառված գրքերից մեկը՝ Նիկոլ Փաշինյանի «Երկրի հակառակ կողմը», գրվել է 2008-2009 թվականների ընթացքում, երբ հեղինակը գտնվում էր ընդհատակում: Վեպի է վերածվել հոդվածաշարը, որը տպագրվել է 2008 թվականի մայիս-դեկտեմբեր ամիսներին «Հայկական ժամանակ» օրաթերթում: «2018 թվականի հունվարին ինձ մոտեցավ մի սկսնակ հրատարակիչ և առաջարկեց կազմակերպել «Երկրի հակառակ կողմը» վեպի տպագրությունը՝ առանձին գրքով։ Ես թերահավատությամբ վերաբերվեցի այդ գործը կազմակերպելու նրա հմտությանը, այնուամենայնիվ, ժամանակ խնդրեցի վեպը կարդալ-խմբագրելու համար։ Վեպի ընթերցումը 10 տարի անց ինձ տակնուվրա արեց պարզապես։ Իմ ներսում մի իսկական փոթորիկ սկսվեց, մի իսկական հեղափոխություն։ Ես հասկացա, որ ժողովրդի հաղթանակի ժամը եկել է…»,- գրում է Նիկոլ Փաշինյանը:





https://zen.yandex.ru/id/5dee07a31e8e3f00ae3051c1
Tokyo 2020
youtube

Բոլոր նորությունները    


New Xar

Գործակալության մասին

Հասցե՝ Հայաստան, 0002, Երեւան, Սարյան փող 22, Արմենպրես
Հեռ.՝ +374 11 539818
Էլ-փոստ՝ [email protected]
settings Էջի կարգավորումներ