ԵՐԵՎԱՆ, 18 ԴԵԿՏԵՄԲԵՐԻ, ԱՐՄԵՆՊՐԵՍ: «Հայաստանի առաջին հանրապետության Ազգային ժողովի որոշմամբ 1918 թվականի դեկտեմբերի 18-ին ստեղծվեց «Արմենպրես» լրատվական գործակալությունը՝ որպես Հայկական հեռագրական գործակալություն։ Այսօր լրացել է «Արմենպրես»-ի հիմնադրման 100-ամյակը, ինչի առթիվ գործընկերները շնորհավորական ուղերձներ են հղել:

«Բիզնես 24»-ը սրտանց շնորհավորել է գործակալության բոլոր աշխատակիցներին և ընթերցողներին՝ մաղթելով երկարամյա և կայուն գործունեություն։ «24News»-ը ևս ջերմորեն շնորհավորում է ՀՀ պետական լրատվական գործակալությանը՝ «Արմենպրես»-ին, իր մեկդարյա հոբելյանի առթիվ: «Անցնող հարյուր տարիների ընթացքում Դուք եղել եք այնտեղ, որտեղ հայ ժողովուրդն է, լուսաբանել եք կարևոր իրադարձությունները, միջազգայնորեն հանրայնացրել մեր ժողովրդի ձեռքբերումները»,-նշված է ուղերձում: «24News»-ի անձնակազմը գործակալության աշխատակիցներին մաղթել է ստեղծագործական նորանոր նվաճումներ և արգասաբեր գործունեություն հարյուրամյակներ: Շնորհավորանքներին միացել են  նաև «Երկիր Մեդիա»-ն, «Ա1+»-ը, «Երկիր»-ը: «Lragir.am»-ի աշխատակազմը շնորհավորելով «Արմենպրես»-ի գործընկերներին՝ մաղթել է ամենայն բարիք ու  ստեղծագործական նվաճումներ: