Դեկտեմբերի 12-ին սպասվող իրադարձությունները
«Արմենպրես» պետական լրատվական գործակալությունը ներկայացնում է այսօր սպասվող իրադարձությունները:
Այսօր՝ դեկտեմբերի 12-ին, «Հայոց ցեղասպանության թանգարան-ինստիտուտ» հիմնադրամը և Կանադայի մարդու իրավունքների թանգարանը (ԿՄԻԹ) կստորագրեն փոխըմբռնման հուշագիր: Այն հնարավորություն կտա համագործակցել կրթական, գիտական, թանգարանային ոլորտներում:
Ազգային ժողովի արտահերթ ընտրություններին, մեդիա դաշտում դրանց արձագանքին, նոր իշխանությունից հասարակության սպասելիքներին հրավիրված մամուլի ասուլիսներում կանդրադառնան մեդիա ոլորտի փորձագետներ, քաղաքական հասարակական գործիչներ:
Խնկո-Ապոր անվան ազգային մանկական գրադարանում կանցկացվի գրքի ցուցահանդես-տոնավաճառ՝ նվիրված Խնկո-Ապոր անվան ազգային մանկական գրադարանի 85, «Արմենպրես» պետական լրատվական գործակալության 100, և «Էդիթ Պրինտ» հրատարակչության 25-ամյակներին: Այսօր հրավիրված ասուլիսում կներկայացվեն մանրամասներ ցուցահանդես-տոնավաճառի վերաբերյալ:
Հայաստանում ԱՄՆ դեսպանության տեղեկատվական ռեսուրսների կենտրոնը շուրջ 100 անուն գիրք կնվիրաբերի Հայաստանի ազգային գրադարանին, որոնք ստացվել են ԱՄՆ Կոնգրեսի գրադարանի հետ գրքերի փոխանակման ծրագրի շրջանակում:
Դեկտեմբերի 15-ին նախատեսված է Նկարիչների միության համագումարը: Միջոցառմանն ընդառաջ Նկարիչների միության անդամները կանդրադառնան միությունում առկա տարաձայնություններին ու ներքին խմորումներին:
«Մեգերյան Կարպետ»-ում տեղի կունենա Տուրիզմի հայկական ֆեդերացիայի և հոլանդական «PUM» ծրագրի համագործակցությամբ կազմակերպված «Ներգնա և արտագնա զբոսաշրջային օպերատորի գործունեություն» դասընթացի ավարտական վկայականների շնորհման հանդիսավոր արարողությունը:
Մարզական անցուդարձից, Հայաստանի դահուկավազքի ֆեդերացիայի գլխավոր քարտուղար Գագիկ Սարգսյանը հանդես կգա մամուլի ասուլիսով: Նա կամփոփի միջազգային մրցաշարերի արդյունքները, կանդրադառնա առաջիկա անելիքներին:
Այս և այլ թեմաների մասին կարող եք մանրամասն ընթերցել armenpress.am կայք էջում: Հետևեք մեզ նաև թվիթերում և ֆեյսբուքում:
Բաժանորդագրվեք մեր ալիքին Telegram-ում