«Արմենպրես» պետական լրատվական գործակալությունը ներկայացնում է այսօր սպասվող իրադարձությունները:

Վարչապետի պաշտոնակատար Նիկոլ Փաշինյանն այսօր՝ դեկտեմբերի 6-ին, Սանկտ Պետերբուրգում կմասնակցի Եվրասիական բարձրագույն տնտեսական խորհրդի հերթական նիստին։ Պաշտոնական հաղորդագրության համաձայն՝ նախատեսված է նաև Նիկոլ Փաշինյանի հանդիպումը տեղի հայ համայնքի ներկայացուցիչների հետ։   

Դեկտեմբերի 6-7-ը Իտալիայի Միլան քաղաքում տեղի կունենա ԵԱՀԿ Նախարարական խորհրդի 25-րդ նիստը։

Հայաստանն ու Մոնղոլիան դիվանագիտական և պաշտոնական անձնագրեր ունեցող անձանց կազատեն մուտքի արտոնագրի պահանջից: Այս մասին նախագիծն ընդգրկված է այսօր կայանալիք կառավարության նիստի օրակարգում:

Ազգային ժողովի արտահերթ խորհրդարանական ընտրությունների քարոզարշավի 11-րդ և նախավերջին օրն է: «Մոսկվա» կինոթատրոնի մոտ նախատեսված է «Լուսավոր Հայաստան» կուսակցության նախընտրական հանրահավաքը, որից հետո երթով կշարժվեն դեպի Հանրապետության հրապարակ։ «Քրիստոնեա-ժողովրդական վերածնունդ» կուսակցության նախագահ Լևոն Շիրինյանը կհանդիպի առաջիկա ԱԺ ընտրությունների պատգամավորների թեկնածուների հետ: Մամուլի ասուլիսով հանդես կգա Հանրապետական կուսակցությունից Արմեն Աշոտյանը:

«GALLUP International association»-ի Հայաստանում լիիրավ անդամ «ԷմՓիՋԻ» ընկերության տնօրեն Արամ Նավասարդյանը հանդես կգա մամուլի ասուլիսով: Նա կներկայացնի քվեարկությանն ընդառաջ իրականացրած հարցման արդյունքները:

Այսօր կկայանա ՌԴ Պետդումայի պատգամավոր, Ռուսաստանի վաստակավոր բժիշկ Գենադի Օնիշչենկոյի մամուլի ասուլիսը՝ նվիրված Սպիտակի երկրաշարժի 30-ամյա տարելիցին: Նա աղետի գոտում եղել է ԽՍՀՄ Առողջապահության նախարարության հակահամաճարակային մասնագիտացված 4 խմբերի ղեկավարն ու համակարգողը:

Դիլիջանում կկայանա Մաքսային միության անդամ պետությունների մաքսային ծառայությունների միավորված կոլեգիայի 29-րդ նիստը:

Այս և այլ թեմաների մասին կարող եք մանրամասն ընթերցել armenpress.am կայք էջում: Հետևեք մեզ նաև թվիթերում և ֆեյսբուքում: