ԵՐԵՎԱՆ, 8 ՆՈՅԵՄԲԵՐԻ, ԱՐՄԵՆՊՐԵՍ: «Գազպրոմ Արմենիա»-ի  ծախսերն ավելի շատ են, քան ապահովվող մուտքերը: Նման պարագայում գազի գնի իջեցման նպատակով լրացուցիչ ռեզերվներ գտնելու հարցը խնդրահարույց է:

«Արմենպրես»-ի հաղորդմամբ`նոյեմբերի 8-ին ԱԺ գազի և էլեկտրաէներգիայի հարցով քննիչ հանձնաժողովում նման տեսակետ հայտնեց «Գազպրոմ Արմենիա» ՓԲԸ վարչության նախագահ -գլխավոր տնօրեն Հրանտ Թադևոսյանը:

Հանձնաժողովի նախագահ Միքայել Մելքումյանը նշեց, որ հանրությանը հետաքրքրում է այն հարցը, թե, այնուամենայնիվ, գազը սահմանի վրա 150 դոլարով ձեռք բերելու դեպքում վերջնական սպառողին ինչո՞ւ է հասնում շատ ավելի բարձր գնով: «Ծախսերի ողջ օպտիմալացման արդյունքում կա՞ արդյոք ռեզերվ, որը կհանգեցնի միջին սակագնի իջեցմանը»,-հարցրեց Մելքումյանը:

Թադևոսյանը նշեց, որ գազի վաճառքի գինը 255 դոլար է, իսկ գազի մուտքի միջին գինը 150 դոլար: «Գազպրոմ Արմենիա»-ի մարժան 62 դոլար է: «Ունենք հոդված, որտեղ գրված է 13.37 մլրդ դրամի չստացված եկամուտ: Այսինքն՝ մեր ծախսերն ավելի շատ են, քան ապահովվող մուտքերը: Նման պարագայում լրացուցիչ ռեզերվներ գտնելու հարցը խնդրահարույց է»,-եզրափակեց նա: