Մաթեմատիկոս Մխիթար Ջրբաշյանի հոբելյանը նշանավորվում է եռօրյա գիտաժողովի անցկացմամբ
ԵՐԵՎԱՆ, 22 ՀՈԿՏԵՄԲԵՐԻ, ԱՐՄԵՆՊՐԵՍ: Հայ մեծանուն գիտնական, ՀԽՍՀ Գիտությունների ակադեմիայի ակադեմիկոս, մաթեմատիկոս Մխիթար Ջրբաշյանի 100-ամյակի կապակցությամբ հոկտեմբերի 22-ին ՀՀ գիտությունների ազգային ակադեմիայում մեկնարկեց Ջրբաշյանին նվիրված եռօրյա միջազգային գիտաժողովը:
«Արմենպրես»-ի հաղորդմամբ` ՀՀ գիտությունների ազգային ակադեմիայի նախագահ, ակադեմիկոս Ռադիկ Մարտիրոսյանը բացման խոսքում ասաց, որ գիտաժողովների միջոցով վերհիշում են հայ երախտավորների անցած ճանապարհը, նրանց դերը գիտության նվաճումների, ձեռքբերումների, մասնագետների պատրաստման գործում:
«Մխիթար Ջրբաշյանը հետաքրքիր մարդ էր, շատ ակտիվ: Նա ակադեմիային է նվիրել իր ամբողջ կյանքը: Դասախոսություններ էր կարդում տարբեր հաստատություններում, բայց միշտ հավատարիմ էր ակադեմիային»,- նշեց Մարտիրոսյանը:
Ակադեմիկոս Անրի Ներսիսյանի խոսքով` Ջրբաշյանը հայտնի էր ոչ միայն Խորհրդային Միությունում, այլև դրա սահմաններից դուրս: «Ես նրա աշակերտն էի: Ջրբաշյանից շատ բան եմ սովորել, մասնավորապես` աշխատաոճը: Նա ուսուցիչ էր, իսկ ուսուցիչներին համեմատում են ծնողների հետ, դա խորը իմաստ ունի: Դժբախտաբար, մենք նրանց ավելի ենք գնահատում, երբ հեռանում են»,- նկատեց Ներսիսյանը:
«Ես երիտասարդ էի, իսկ Ջրբաշյանը ավելի փորձառու էր: Ես Մեխանիկայի ինստիտուտի տնօրենն էի, իսկ նա` Մաթեմատիկայի ինստիտուտի: Ցանկացած հարցով դիմում էինք միմյանց և համագործակցում: Նրա հետ աշխատելը և’ հեշտ էր, և’ դժվար, որովհետև Ջրբաշյանը շատ ուղղամիտ էր և կարող էր շուտ բռնկվել»,- պատմեց ակադեմիկոս Լենսեր Աղալովյանը:
Նա փաստեց, որ Ջրբաշյանը, մեծ գիտնական լինելուց բացի, նաև ակտիվ քաղաքացի էր և այս կամ այն չափով արձագանքում էր հայ ժողովրդին հուզող բոլոր հարցերին: «Բարի էր, հայրենասեր, նվիրված էր իր աշխատանքին»,- եզրափակեց Աղալովյանը:
Մխիթար Ջրբաշյանը 1936-1941 թվականներին ուսանել է ԵՊՀ ֆիզիկայի և մաթեմատիկայի ֆակուլտետում։ 1942 թվականից աշխատել է Երևանի պետական համալսարանում և ՀՀ գիտությունների ազգային ակադեմիայում:
1945 թվականին նա պաշտպանում է թեկնածուական ատենախոսությունը «Անալիտիկ ֆունկցիաների ներկայացման որոշ հարցեր» թեմայով։ Դա մաթեմատիկայից առաջին թեկնածուական ատենախոսության պաշտպանությունն էր ԵՊՀ-ում։ 1949 թվականին Մոսկվայի պետական համալսարանում պաշտպանում է դոկտորական աշխատանքը։
1953 թվականին Ջրբաշյանն ընտրվում է թղթակից անդամ, 1956 թվականին՝ ՀՀ ԳԱԱ իսկական անդամ։ Եղել է ՀՀ ԳԱԱ նախագահության անդամ: 1964-1973թթ. զբաղեցրել է ֆիզիկա-մաթեմատիկական գիտությունների բաժանմունքի ակադեմիկոս-քարտուղարի պաշտոնը։
Ջրբաշյանը եղել է «Մաթեմատիկա» ամսագրի գլխավոր խմբագիր դրա կազմավորման օրվանից՝ 1966 թվականից:
Բաժանորդագրվեք մեր ալիքին Telegram-ում