Կրթության և գիտության նախարարը կոչ է անում չգնել հեղափոխության խորհրդանիշներով դպրոցական պարագաներ
10:38, 16 Օգոստոս 2018
ԵՐԵՎԱՆ, 16 ՕԳՈՍՏՈՍԻ, ԱՐՄԵՆՊՐԵՍ: Վերջին օրերին համացանցում հայտնվել են հրապարակումներ, որոնց համաձայն՝ որոշ ձեռներեցներ վաճառում են հեղափոխության խորհրդանիշներով դպրոցական պարագաներ:
Ինչպես տեղեկացնում է «Արմենպրես»-ը, ՀՀ կրթության և գիտության նախարար Արայիկ Հարությունյանը «Ֆեյսբուք» սոցիալական ցանցի իր էջում գրել է, որ կոչ է անում չգնել հեղափոխության խորհրդանիշներով դպրոցական պարագաներ:
«Հասկանալով հանդերձ հեղափոխությամբ պայմանավորված ոգևորությունը՝ այդուամենայնիվ, վերահաստատում ենք դպրոցներն ապաքաղաքականացնելու մեր հանձնառությունը, և կոչ եմ անում ու հորդորում ծնողներին՝ չգնել նման արտադրանք իրենց դպրոցահասակ երեխաների համար»,- գրել է Հարությունյանը:
Բաժանորդագրվեք մեր ալիքին Telegram-ում