ԵՐԵՎԱՆ, 7 ՀՈՒԼԻՍԻ, ԱՐՄԵՆՊՐԵՍ: Հայաստանում Ամերիկայի Միացյալ Նահանգների դեսպան Ռիչարդ Միլսը հավաստիացրել է, որ Հայաստանի հետ հարաբերությունները միշտ մեծ հետաքրքրություն ու կարևորություն են ներկայացրել ԱՄՆ-ի և այդ երկրի ղեկավարության համար:

«Արմենպրես»-ի փոխանցմամբ՝ «Ամերիկայի ձայնին» տված հարցազրույցում այս մասին ասել է դեսպանը՝ հավելելով, որ ակնկալում են համագործակցել նոր կառավարության հետ: «Նոր կառավարության առաջնահերթությունները, կարծում եմ, կարևոր են` տնտեսությունն ավելի արդար դարձնել բոլորի համար, բարելավել մարդու իրավունքների պաշտպանության վիճակը, վերջ դնել կոռուպցիային: Սրանք առաջնահերթություններ են, որոնք մենք նույնպես կցանկանայինք իրագործված տեսնել, և դեսպանությունը, և ԱՄՆ-ի կառավարությունն ակնկալում են աշխատել նոր կառավարության հետ, որպեսզի օգնենք նոր կառավարությանն իրագործել նպատակները: Դա բավականին բարդ է լինելու: Համոզված եմ, հայերն այնքան իմաստուն են, որ սա գիտակցում են: Փողոց դուրս գալը, խաղաղ բողոքելը մարտահրավերներ էին Հայաստանի քաղաքացիների համար, նրանք ընդունեցին և հաջողությամբ հաղթահարեցին: Խնդրի բարդ կողմն էl այդ արժեքներն իրական գործողությունների վերածելն է»,-ասել է Ռիչարդ Միլսը:

 Նա վստահեցրել է, որ սերտորեն աշխատելու են կառավարության հետ: Դեսպանի խոսքով,  հիմնական ոլորտը, որտեղ իրենք կարող են աջակցություն ցուցաբերել և ինչում մեծապես հետաքրքրված են թե՛ Հայաստանի իշխանությունները, և թե՛ ԱՄՆ-ում բնակվող հայերը, երկու երկրների միջև առևտրի և ներդրումների խրախուսումն է:

 «Դա դեսպանության և իմ առաջնահերթություններից էր նախորդ երեք տարիների ընթացքում, նույնիսկ մինչև վերջին իրադարձությունները մենք որոշակի հաջողություններ գրանցել ենք: Վերջին 3 տարիների ընթացքում գրանցվել է 600 միլիոն դոլարի ամերիկյան նոր ներդրումներ Հայաստանի տնտեսության մեջ»,-հավելել է դեսպանը:

2017-ին երկրների միջև առևտուրը բարձրացել է 2008-ի մակարդակից ավելի, գրանցվել է 42 տոկոսի աճ՝  2016-ի համեմատ: Նա տեղեկացրել է, որ ընթացիկ տարվա առաջին 4 ամիսների ընթացքում ևս 30 տոկոս աճ է գրանցվել: «Կարծում եմ, եթե կառավարությանը հաջողվի առաջընթաց գրանցել կոռուպցիայի հաղթահարման, դատական իշխանության անկախության ապահովման հարցում, ապա առևտրի ծավալներն էլ ավելի կաճեն, որովհետև վերջին 3 տարիների ընթացքում որպես դեսպան ես բազմիցս եմ լսել՝  թե ամերիկյան գործարարներից, և թե հենց Հայաստանի ձեռնարկատերերից, որ առևտրի, գործարարության հիմնական խոչընդոտն այն զգացումն է, որ Հայաստանում չկան հավասար խաղի կանոններ և համակարգը ոմանց նկատմամբ մյուսներից ավելի բարենպաստ էր: Այնպես որ, եթե կառավարությունը կարողանա դա հաղթահարել, կարծում եմ, իրական հնարավորություն կա, իրական ապագա՝ ԱՄՆ-ի կողմից խոշոր առևտրի և ներդրումների, որն իմ կարծիքով մեծագույն աջակցությունն է, որ մենք կարող ենք տրամադրել Հայաստանին»,-վստահեցրել է ԱՄՆ դեսպան Ռիչարդ Միլսը: