Ժամանակը Երևանում՝ 11:07:36,   24 Սեպտեմբեր

Հայանիստի բնակիչները բողոքում են խմելու ջրի որակից. պարզաբանում են նախարարությունն ու «Վեոլիա Ջուրը»

Հայանիստի բնակիչները բողոքում են խմելու ջրի որակից. պարզաբանում են 
նախարարությունն ու «Վեոլիա Ջուրը»

ԵՐԵՎԱՆ, 21 ՀՈՒՆԻՍԻ, ԱՐՄԵՆՊՐԵՍ: Արարատի մարզի Հայանիստ համայնքում բնակիչները տարիներ շարունակ բողոքում են խմելու ջրի որակից՝ նշելով, որ դրանում նստված է առաջանում: Խմելու ջրի մատակարարման և ջրահեռացման համակարգերի միասնական օպերատոր «Վեոլիա Ջուր» ընկերությունից էլ փաստում են, որ այդ և նման խնդիր ունեցող մնացած համայնքներին ընկերությունը կարողանում է լեռնային աղբյուրներից եկող ջուր մատակարարել միայն որոշակի ամիսների:

«Արմենպրես»-ի հետ զրույցում «Վեոլիա Ջուր» ընկերության մամուլի խոսնակ Մուրադ Սարգսյանն ասաց, որ խնդիրը տասնամյակներ շարունակ գոյություն ունի, սակայն խնդրի մեղավորության իրենց բաժինն ունեն հենց գյուղացիները: «Ոռոգման սեզոնին, որոշ բնակիչներ, ապօրինի ջրագծերի միջոցով վերցնում են աղբյուրներից եկող ջուրն ու օգտագործում անգամ ոռոգման նպատակներով, իսկ մեզ այլ ելք չի լինում, քան բնակիչներին տալ ջուր՝ խորքային հորերից»,-ասաց Սարգսյանը, հավելելով, որ տարեկան ընկերությունը 4000-5000 ապօրինի ջրագիծ է հայտնաբերում:

Մուրադ Սարգսյանը նշեց, որ նույն խորքային ջուրը բնակիչներին մատակարարել է նաև նախկին օպերատոր «Հայջրմուղկոյուղի» ՓԲԸ-ն, և 2017 թվականի հունվարի 1-ից գործունեություն ծավալելով՝ ներկայիս օպերատոր «Վեոլիա Ջուր» ընկերությունը կարողացել է հասնել նրան, որ բնակչները աշնանից մինչև գարնան վերջ ստանում են լեռնային աղբյուրներից եկող բարձրորակ ջուր: «Ոռոգման սեզոնին ապօրինի ջրագծերով ջուրը այլ կարիքների համար է օգտագործում և ստացվում է այնպես, որ ամռանը մենք որոշակի ջրի անբավարարություն ենք ունենում և դրա փոխարեն ստիպված ենք լինում միացնել խորքային հորերը, ինչը մեզ համար ոչ միայն ջրի որակի խնդիր է, այլև ծախսի, որովհետև այդ ջրերը պոմպերով են աշխատում, իսկ դա թանկ է»,-նշեց ընկերության մամուլի խոսնակը՝ ընդգծելով, որ խմելու ջրի հետ կապված խնդիրներում առաջին հերթին շահագրգռված է հենց «Վեոլիա Ջուր» ընկերությունը: «Եթե մեկը ենթադրում է, որ ջմրուղը չարանենգորեն լեռնային ջուր չի տալիս մարդկանց և մարդիկ ստիպված են լինում խմել խորքային ջուր, սխալվում են: Մենք այդ թանկ ջրից ուրախությամբ կհրաժարվեինք»,-պարզաբանեց նա:

Մուրադ Սարգսյանը նաև նշեց, որ Արարատի մարզի Հայանիստ համայնքում ընկերությունը փոխել է ջրագիծը, սակայն ապօրինությունների դեմ պայքարը դեռ խնդիր է մնում: «Մարդիկ պետք է գիտակցեն, որ խմելու ջուրն անհրաժեշտ է օգտագործել ըստ նշանակության»,-հավելեց Սարգսյանը՝ հորդորելով բնակիչներին համբերել մինչ ոռոգման սեզոնի ավարտը:

Նա վստահեցրեց, որ խորքային ջուրը ևս նախատեսված է խմելու համար և համապատասխանում է խմելու ջրի չափանիշներին:

ՀՀ առողջապահության  նախարարի մամուլի խոսնակ Լիանա Եղիազարյանը մեզ հետ զրույցում ասաց, որ Արարատի մարզի Հայանիստ համայնք մտնող ջրատարի ջրի որակը ստուգվել է հունիսի 14-ին և որևէ մանրէաբանական շեղում չի հայտնաբերվել: «Ամիսը մեկ անգամ հիգիենիկ, համաճարակային անալիզներ են արվում՝ պարզելու համար հիմնական ջրատարի մեջ մարէաբանական շեղումներ կան, թե ոչ»,-ասաց գերատեսչության խոսնակը՝ հավելելով, որ գնալով բարձրացրած խնդրի հետքով, արտահերթ ստուգում իրականացնելու հանձնարարական կտրվի և նորից կստուգվի գյուղ մտնող ջրատարի ջուրը:

Հայանիստ համայնքի բնակիչների այն մտահոգությանը, որ խմելու ջուրը բաժակում պահելիս նստվածք է առաջանում, առողջապահության նախարարությունից հավաստիացրեցին, որ դա կարող է լինել տեխնիկական պատճառ և պարտադիր չէ, որ ջուրն ունենա մանրէաբանական աղտոտում:





https://zen.yandex.ru/id/5dee07a31e8e3f00ae3051c1


youtube

Բոլոր նորությունները    


New Xar

Գործակալության մասին

Հասցե՝ Հայաստան, 0002, Երեւան, Սարյան փող 22, Արմենպրես
Հեռ.՝ +374 11 539818
Էլ-փոստ՝ [email protected]
settings Էջի կարգավորումներ