ՀՀ ոստիկանությունը աշխատակիցները ծառայություն են իրականացնում Երևանի քաղաքապետարանի շենքում
ԵՐԵՎԱՆ,16 ՄԱՅԻՍԻ, ԱՐՄԵՆՊՐԵՍ: ՀՀ ոստիկանության աշխատակիցները Երևանի քաղաքապետարանի շենքում ծառայություն են իրականացնում:
Այս մասին «Արմենպրես»-ին տեղեկացրին ՀՀ ոստիկանության հասարակայնության հետ կապի և լրատվության վարչությունից:
Անդրադառնալով հարցին, թե արդյոք ընթացք տրվե՞լ է Երևանի քաղաքապետարանի կողմից ուղարկված դիմումին` քաղաքապետարանի բնականոն գործունեությունը վերականգնելու վերաբերյալ, ՀՀ ոստիկանության լրատվական բաժնից նշեցին, որ դիմումը հրապարակային է եղել, և այս պահին ոստիկանները քաղաքապետարանի շենքում ծառայություն են իրականացնում:
Երևանի քաղաքապետարանը դիմել էր ՀՀ ոստիկանություն՝ պահանջելով ձեռնարկել միջոցներ։
Երևանի քաղաքապետարանի աշխատակազմի քարտուղար Սերգեյ Մակարյանի կողմից ուղարկված դիմումի մեջ ասվում է.
«Հարգելի պրն Օսիպյան, օրենսդրության խախտմամբ տեղի է ունեցել ներխուժում՝ ՀՀ ոստիկանության կողմից պահպանվող պետական պահպանության օբյեկտ հանդիսացող Երևանի քաղաքապետարանի շենք, խոչընդոտելով քաղաքապետարանի աշխատանքի բնականոն ընթացքը:
Դիմում ենք Ձեզ՝ ձեռնարկելու միջոցներ ոչ օրինական գործողությունները դադարեցնելու և քաղաքապետարանի բնականոն գործունեությունը վերականգնելու համար»:
Մյասնիկյանի արձանի հարակից այգում ծառերի հատման դեմ բողոքող ակտիվիստները մայիսի 16-ին ներխուժել են քաղաքապետարանի շենք, բարձրացել երրորդ հարկ և հանդիպում են պահանջում Երևանի քաղաքապետ Տարոն Մարգարյանի հետ:
Ակտիվիստներին մոտեցել է Երևանի քաղաքապետի տեղակալ Դավիթ Օհանյանը: Նա նշել է, որ նման ձևով հարցեր չեն լուծում: Նա առաջարկել է վերադառնալ ճեպազրույցների դահլիճ, որտեղ հանդիպում կունենան քաղաքապետարանի աշխատակազմի ղեկավարի և համապատասխան մարդկանց հետ, ովքեր կպատասխանեն նրանց հարցերին: Ակտիվիստները, սակայն մերժում են ներկայացվող բոլոր առաջարկները՝ պնդելով, որ ցանկանում են հանդիպել միայն Տարոն Մարգարյանի հետ:
Բաժանորդագրվեք մեր ալիքին Telegram-ում