ԵՐԵՎԱՆ, 16 ԱՊՐԻԼԻ, ԱՐՄԵՆՊՐԵՍ: Ազգային ժողովի պատգամավոր Նիկոլ Փաշինյանը և նրա կողմնակիցները, ովքեր քայլերթով շարժվել են դեպի Խանջյան փողոց, ներխուժեցին Խ. Աբովյանի անվան հայկական պետական մանկավարժական համալսարան: Մտնելով համալսարանի շենք՝ երթի մասնակիցները բուհի տարածքում դասադուլի կոչեր են հնչեցնում:

«Արմենպրես»-ի թղթակցի փոխանցմամբ՝ նրանք մինչ այդ փորձել էին ներխուժել Խանջյան փողոցի վրա գտնվող Ճարտարապետության և շինարարության Հայաստանի ազգային համալսարանի Մանուկ Աբեղյանի անվան ավագ դպրոց: Նրանց հաջողվեց բացել դպրոցի փակ դուռը, սակայն մի քանի րոպե դռան մոտ սպասելուց հետո մասնակիցները գնացին՝ ներս չմտնելով:

Այս պահին դադարեցված է երթևեկությունը քաղաքի մի շարք այլ բանուկ փողոցներում ևս: Մասնավորապես, երթևեկը կաթվածահար է եղել Բաղրամյան-Մոսկովյան, Կորյուն-Աբովյան խաչմերուկներում, Հերացու՝ դեպի Նոր Նորք բարձրացող հատվածում, Ֆրանսիայի հրապարակում: Փողոցներում ցուցարարները տեղադրել են նստարաններ, աղբամաններ՝ դրանք հանելով իրենց համար նախատեսված տեղերից:

Ոստիկանությունը հայտարարել է, որ նման գործողությունները կարող են ծնել հանցագործություններ՝ ուղղված քաղաքացիների կյանքի, առողջության և գույքի դեմ: ՀՀ ոստիկանությունը ևս մեկ անգամ պարզաբանում է, որ խաղաղ, սակայն հասարակական կարգի խմբային խախտումներով ուղեկցվող հավաքի իրավունքը բացարձակ չէ և կարող է ենթարկվել սահմանափակումների՝ իրավիճակից բխող համաչափ ոստիկանական գործողություններով, ընդհուպ մինչև հավաքի դադարեցման որոշման ընդունում: