ԵՐԵՎԱՆ, 13 ԱՊՐԻԼԻ, ԱՐՄԵՆՊՐԵՍ: ՀՀ բոլոր մարզերի, այդ թվում` մայրաքաղաքի համայնքային բյուջեների սեփական եկամուտները 2018-ի առաջին եռամսյակին աճել են 2017-ի նույն ժամանակահատվածի համեմատ: «Արմենպրես»-ի փոխանցմամբ` այս մասին ֆեյսբուքյան իր էջում գրառում է կատարել ՀՀ վարչապետի պաշտոնակատար Կարեն Կարապետյանը: «Դեռևս անցած տարի մեր առջև ամբիցիոզ խնդիր էինք դրել սեփական եկամուտների աճ ապահովել: Այս տարվա առաջին եռամսյակի համայնքների բյուջեների սեփական եկամուտների վերաբերյալ վիճակագրությունը, որի համաձայն` ունենք աճ բոլոր մարզերում, վկայում է, որ ճիշտ ուղու վրա ենք»,-գրել է Կարեն Կարապետյանը:

Համաձայն հրապարակված ինֆոգրաֆիկայի`ամենաբարձր աճը գրանցվել է Տավուշում` 61.3 տոկոս, ամենացածրը` Սյունիքում` 7 տոկոս: Արարատում աճը կազմել է 51.6, Շիրակում` 39.6, Լոռիում` 34.5, Կոտայքում` 30.5 տոկոս: Երևանում աճը 17.6 տոկոս է: