Սպասվող լրահոս. 24.10.2017
ԵՐԵՎԱՆ, 24 ՀՈԿՏԵՄԲԵՐԻ, ԱՐՄԵՆՊՐԵՍ: «Արմենպրես» լրատվական գործակալությունը Լրատվական ռադիոյի եթերում ներկայացնում է այն ամենն, ինչի մասին կկարդաք, կլսեք ու կտեսնեք այսօրվա լրահոսում:
Այսօր` հոկտեմբերի 24-ին, ՀՀ վարչապետ Կարեն Կարապետյանի հրավերով պաշտոնական այցով Հայաստան է ժամանում Ռուսաստանի վարչապետ Դմիտրի Մեդվեդևը։ Այցի շրջանակում նախատեսվում է Կարեն Կարապետյանի և Դմիտրի Մեդվեդևի առանձնազրույցը, որին կհաջորդեն ընդլայնված կազմով բանակցությունները և փաստաթղթերի ստորագրման արարողությունը։ Նախատեսվում է նաև Մեդվեդևի հանդիպումը Հայաստանի նախագահ Սերժ Սարգսյանի հետ։
Այսօր մեկնարկում է ՀՀ ԱԺ հերթական քառօրյա նիստը:
Կանցկացվի Երևան–Քիշնև տեսակամուրջ `«ԵՄ-ի հետ համապարփակ և ընդլայնված գործընկերության մասին համաձայնագրի ստորագրումը» թեմայով: 2017 թ. նոյեմբերին Բրյուսելում տեղի կունենա «Արևելյան գործընկերության» գագաթնաժողովը, որտեղ նախատեսվում է Հայաստանի և ԵՄ-ի միջև համապարփակ և ընդլայնված գործընկերության մասին համաձայնագրի ստորագրումը: Տեսակապի մասնակիցները կանդրադառնան Արևելյան գործընկերության գագաթնաժողովին:
Հայ ժողովրդի մեծ բարեկամ Քահանա Կառլ-Հայնց Շայդեն, «Գթության խոհանոց» ծրագրի պատվո հովանավորներ՝ Երևանի քաղաքապետ պարոն Տարոն Մարգարյանը և ՀՀ-ում Գերմանիայի Դաշնային Հանրապետության դեսպան Մաթիաս Քիսլերը կհայտարարեն «Գթության խոհանոց» ծրագրի 24-րդ շրջանի բացման մասին:
Լրագրողների հետ կհանդիպի «Ընդդեմ իրավական կամայականության» ՀԿ ղեկավար Լարիսա Ալավերդյանը: Նա կխոսի արցախյան հիմնախնդրի մասին աշխարհաքաղաքական գործընթացների համատեքստում: Լարիսա Ալավերդյանը կանդրադառնա Թուրքիա-Վրաստան-Ադրբեջան ռազմական համագործակցությանը:
«Բյուրոկրատ» գրախանութում տեղի կունենա ամերիկացի գրող, սցենարիստ և մուլտիպլիկատոր Շել Սիլվերսթինի «Անձնվեր ծառը» բեսթսելեր գրքի շնորհանդեսը: Գիրքն իսկական բարոյական ուղերձ է և ուղեցույց՝ նախադպրոցական ու կրտսեր դպրոցական տարիքի երեխաների համար:
Կոմիտասի անվան կամերային երաժշտության տանը Խաչատրյանի 5-րդ միջազգային փառատոնի շրջանակներում կկայանա «Հովեր» պետական կամերային երգչախմբի համերգը։ Կներկայացվեն հայ և եվրոպացի կոմպոզիտորների երգչախմբային ստեղծագործությունները։ Դիրիժոր՝ Սոնա Հովհաննիսյան Խաչատրյանի միջազգային փառատոնն անցկացվում է ՀՀ Նախագահ Սերժ Սարգսյանի հովանու ներքո։
Այս և այլ թեմաների մասին կարող եք մանրամասն ընթերցել armenpress.am կայք էջում և լսել լրատվական ռադիոյի եթերում: Հետևեք մեզ թվիթերում և ֆեյսբուքում:
Բաժանորդագրվեք մեր ալիքին Telegram-ում