Ադրբեջանի համար բանակցային գործընթացը ընդամենը քող է զենք կուտակելու եւ իր կեղծիքը շարունակելու. Շավարշ Քոչարյան
ԵՐԵՎԱՆ, 20 ՍԵՊՏԵՄԲԵՐԻ, ԱՐՄԵՆՊՐԵՍ: Բոլորի համար ակնհայտ է, որ Լեռնային Ղարաբաղի հակամարտության կարգավորումը դոփում է տեղում Ադրբեջանի պատճառով: «Արմենպրես»-ի հաղորդմամբ՝ «Հայաստան-Սփյուռք» 6-րդ համաժողովի փակման լիագումար նիստի շրջանակում ամփոփելով համատեղ իրականացված քննարկումները՝ նաեւ կապված հակամարտության կարգավորման գործընթացի հետ, նման համոզմունք հայտնեց ՀՀ փոխարտգործնախարար Շավարշ Քոչարյանը:
«Քննարկումների ժամանակ կարևորվեց այն խնդիրը, որ Սփյուռքը, պահպանելով այն բոլոր ջանքերը, որ գործադրում է Ցեղասպանության ճանաչման հարցում, միաժամանակ էլ ավելի մեծ ուշադրություն հատկացնի Արցախի հարցին: Ադրբեջանի համար բանակցային գործընթացն ընդամենը քող է զենք կուտակելու, իր կեղծիքը, իր քարոզչական պատերազմը շարունակելու համար: Ադրբեջանը գործում է և՛ միջազգային իրավունքի դեմ, և՛ միջնորդ պետությունների՝ ՌԴ-ի, ԱՄՆ-ի, Ֆրանսիայի հորդորների և կոչերի դեմ, և ավելին՝ 2016 թվականին (ապրիլին քառօրյա պատերազմ սանձազերծելով-խմբ.) հստակ ցույց տվեց իր իրական դեմքը»,-ընդգծեց նա:
Շավարշ Քոչարյանի հավաստմամբ՝ 2016 թվականի ապրիլյան իրադարձությունները ոչ այլ ինչ էին, քան 1990-ականների ագրեսիայի կրկնություն:
«1994 թվականի եռակողմ համաձայնագիրը՝ Ադրբեջան, Արցախ, Հայաստան, ռազմական գործողությունների դադարեցման և կրակի դադարեցման ռեժիմ հաստատելու մասին էր: Ուշադրություն եմ դարձնում ռազմական գործողությունների դադարեցում բառակապակցության վրա: Այդ տեսակետից միշտ եղել են խախտումներ, իսկ 2016 թվականի ապրիլյան դեպքերը բացահայտ ռազմական գործողությունների վերսկսում էին: Ադրբեջանը կրկին հայտնվեց ագրեսորի կարգավիճակում»,-ասաց Շավարշ Քոչարյանը՝ Ադրբեջանի գործողությունները որակելով որպես մարդասիրական իրավունքի կոպիտ ոտնահարում:
Բաժանորդագրվեք մեր ալիքին Telegram-ում