Գյումրու «Պատվո բլուր»-ում ՀՀ և ՌԴ պաշտոնյաները հարգել են ռուս-թուրքական պատերազմներում զոհված զինվորականների հիշատակը
ԳՅՈՒՄՐԻ, 20 ՕԳՈՍՏՈՍԻ, ԱՐՄԵՆՊՐԵՍ: Գյումրու «Պատվո բլուր» հուշահամլիրի տարածքում տեղի ունեցավ 19-րդ դարում ռուս-թուրքական պատերազմներում զոհված զինվորականների հիշատակին նվիրված միջոցառում։ Ի հիշատակ նրանց, ում աճյուններն ամփոփված են այս վայրում, ծաղիկներ ու ծաղկեպսակ դրվեցին, հնչեցին երկու երկրների օրհներգները, կատարվեց հիշատակի կարգ՝ ձեռամբ հոգևոր հովիվ հայր Անդրեյի: Իսկ մինչ այդ 1 րոպե լռությամբ ներկաները հարգեցին զոհված զինվորականների հիշատակը:
Արարողությանը ներկա էին մարզային ու քաղաքային իշխանությունների ներկայացուցիչները, ՌԴ հյուպատոս Ալեքսանդր Կոպնինը, պաշտոնատար այլ անձինք, 102-րդ ռազմաբազայի և սահմանապահ ջոկատի զինվորներ և սպաներ: Ելույթի ժամանակ Շիրակի փախմարզպետ Սեյրան Պետրոսյանը կարևորեց հայ և ռուս ժողովուրդների դարավոր բարեկամությունը, նշելով, որ այս հուշահամալիրը այդ բարեկամության վառ ապացույցն է։ Նա ընդգծեց, որ «Պատվո բլուր» հուշահամալիրի բացումն իրապես պատմական իրադարձություն կարելի է համարել:
«Յոթ տարի առաջ` օգոստոսի 20-ին, վերաբացվեց այս հուշահամալիրը, որի բացման հանդիսավոր արարողությանը մասնակցեցին ՌԴ և ՀՀ նախագահները: Այս իրադարձությունը առավել սերտացրեց հայ-ռուսական բազմադարյա բարեկամությունը: Հուշահամալիրի վերաբացումը ևս մեկ ապացույց է, որ մեր երկու ժողովուրդները փառքով են հիշում և խնկարկում իրենց այն որդիներին, որոնք զոհվել են հանուն ազատության: Այսօր էլ, յոթ տարի անց, մենք այստեղ ենք, որպեսզի վառ պահենք նրանց հիշատակը»,- «Արմենպրես»-ի հաղորդմամբ՝ նշեց փոխմարզպետ Սեյրան Պետրոսյանը:
Երկու երկրների դարավոր բարեկամության մասին խոսեց նաև Գյումրու քաղաքապետ Սամվել Բալասանյանը, իսկ ՌԴ նորանշանակ հյուպատոս Ալեքսանդր Կոպնինը ռուս ժողովրդի անունից շնորհակալություն հայտնեց հայ ազգին՝ հոգատար վերաբերմունքի և պատմական հիշողություններիը կարևորելու համար:
2009թ. Շիրակի եւ ՌԴ Ուլյանովսկի մարզերի իշխանությունների նախաձեռնությամբ եւ հայ-ռուսական բարեգործական «Պատվի գործ» կազմակերպության համատեղ ջանքերով, այս տարածքում իրականացվել են բարեկարգման եւ վերակառուցման աշխատանքներ, կառուցվել է ռուս սպաների հիշատակը հավերժացնող հուշարձան, որը բացվեց 2010 թվականին:
Բաժանորդագրվեք մեր ալիքին Telegram-ում